Իրակլի Կոբախիձեն հանդիպել է Օլաֆ Շոլցի հետ
Վրաստանի վարչապետ Իրակլի Կոբախիձեն հանդիպել է Գերմանիայի կանցլեր Օլաֆ Շոլցի հետ։
Վարչապետի մամուլի ծառայությունից հայտնում են, որ Գերմանիայի դաշնային կանցլերում դեմ առ դեմ հանդիպման ժամանակ ընդգծվել է Վրաստանի և Գերմանիայի միջև բարձր մակարդակի քաղաքական երկխոսությունը և երկկողմ հարաբերությունների զարգացման դրական դինամիկան։
«Վարչապետը շնորհակալություն է հայտնել դաշնային կանցլերին՝ եվրաինտեգրման ճանապարհին Վրաստանին ցուցաբերած ամուր աջակցության համար։ Ընդգծվել է Վրաստանին ԵՄ թեկնածու երկրի կարգավիճակ տալու կարևորությունը՝ որպես Վրաստան-ԵՄ հարաբերությունների նոր փուլ։
Կառավարության ղեկավարը ևս մեկ անգամ հաստատել է Վրաստանի կառավարության հավատարմությունը երկրի եվրոպական ընտրությանը և նշել, որ հաջորդ նպատակը Եվրամիությանն անդամակցելու շուրջ բանակցությունների բացումն է։
Հանդիպմանը ուշադրություն է դարձվել տարածաշրջանի անվտանգության միջավայրին։ Վարչապետը նշել է, որ Վրաստանը մնում է Եվրամիության հուսալի գործընկերը, որը նշանակալի ներդրում ունի Հարավային Կովկասում խաղաղության և կայունության ապահովման գործընթացում։
Դաշնային կանցլերը հաստատել է Գերմանիայի ամուր աջակցությունը Վրաստանի տարածքային ամբողջականությանն ու ինքնիշխանությանը։
Զրույցում անդրադարձ է կատարվել նաեւ արտաքին ազդեցության թափանցիկության մասին օրենքի նախագծին։ Վարչապետը նշեց, որ օրենքով նախատեսված է միայն հասարակական կազմակերպությունների կողմից ֆինանսների տարեկան բացահայտումը։
Դեմ առ դեմ հանդիպումից հետո բանակցությունները շարունակվել են ընդլայնված կազմով, որին մասնակցել են երկու երկրների կառավարությունների անդամները։
Զրույցի ընթացքում անդրադարձ է եղել տարբեր ուղղություններով դրական համագործակցությանը, այդ թվում՝ տնտեսության, իրավապահ, մշակույթի, կրթության և գիտության ոլորտներում, երկկողմ հարաբերությունների հետագա խորացման հեռանկարներին։
«Իրակլի Կոբախիձեն Օլաֆ Շոլցին պաշտոնական այցով հրավիրել է Վրաստան»,- նշվում է տեղեկատվության մեջ։