Վրաստանի վարչապետ Իրակլի Կոբախիձեն Համակարգող շտաբի նիստից հետո այցելել է Օզուրգեթիի քաղաքապետարանի Շրոմա գյուղ։

Վրաստանի կառավարության տվյալներով՝ կառավարության ղեկավարը նախարարների կաբինետի անդամների հետ միասին ստուգել է տեղում կատարված աշխատանքները և մանրամասն տեղեկություններ ստացել Արտակարգ իրավիճակների կառավարման ծառայության ղեկավար Թեմուր Մղեբրիշվիլիից։

Նրանց տվյալներով՝ Շրոմա գյուղը ձյան առատ տեղումների պատճառով կտրվել է Օզուրգեթիի քաղաքապետարանից ։ Մայրուղու կրիտիկական հատվածներից մեկում աշխատանքները կատարվել են հատուկ տեխնիկայի կիրառմամբ ողջ գիշեր, իսկ ճանապարհն այժմ ամբողջությամբ մաքրվել է։ Ճանապարհի մաքրման արդյունքում հնարավոր է դարձել սկսել էլեկտրամատակարարումը վերականգնելու համար անհրաժեշտ աշխատանքները, որոնք կավարտվեն առաջիկա ժամերին։

Ինչպես նշել է վարչապետը, շարունակվում են ակտիվ աշխատանքները դեպի բոլոր բնակավայրեր մուտքի ճանապարհների մաքրման, կապի վերականգնման, էլեկտրամատակարարումը վերականգնելու ուղղությամբ։

«Մենք հնարավորինս կապահովենք բնակչությանը սննդով և դեղորայքով, որտեղ անհրաժեշտ լինի։ Արտակարգ իրավիճակների խմբերը շատ ակտիվ են աշխատում: Առայժմ մենք չենք ունեցել որևէ ծանր դեպք, որ արտակարգ դեպք լինի, և շտապօգնության բրիգադը չկարողանա հասնել դեպքի վայր։ Բոլոր կոնկրետ դեպքերում շտապօգնության խմբերը կարողացել են ժամանել դեպքի վայր և շտապ օգնություն ցուցաբերել»,- ասել է Իրակլի Կոբախիձեն։

Կառավարության ղեկավարը շնորհակալություն է հայտնել փրկարարներին, արտակարգ իրավիճակների ջոկատներին, զինվորականներին, տեղական իշխանություններին և համապատասխան աշխատանքներում ներգրավված բոլոր անձանց։

«Նրանք ակտիվորեն աշխատում են շուրջօրյա ռեժիմով բոլոր խնդիրները լուծելու համար ։ Իհարկե, լուրջ դժվարություններ ու խնդիրներ մնում են։ Դեռևս կան բնակավայրեր, որոնք ամբողջովին կտրված են արտաքին աշխարհից, ուստի առավելագույն ուշադրությունը կկենտրոնացվի այնտեղ՝ կապը վերականգնելու համար։ Այս խնդիրների լուծման համար ներգրավվելու են տարբեր միջոցներ»,- ասաց վարչապետը։