Դա շատ կարևոր իրադարձություն է, այստեղ հավաքվում են եվրոպական բոլոր երկրների նախագահներն ու վարչապետները, հատկապես հետաքրքիր է, որ այս միջոցառումն անցկացվում է Բուդապեշտում Ամերիկայի նախագահական ընտրություններից անմիջապես հետո,-նշել է Վրաստանի վարչապետ Իրակլի Կոբախիձեն։ Հունգարիայի մայրաքաղաք Բուդապեշտում մեկնարկեց Եվրոպական քաղաքական միության գագաթնաժողովը։

Կոբախիձեի խոսքով, ինքը ելույթ կունենա ինչպես թեմատիկ պանելում, այնպես էլ լիագումար նիստում։

«Ես ելույթ կունենամ թեմատիկ պանելում, ինչպես նաև եզրափակիչ լիագումար նիստում, որտեղ կհնչեն ուղերձներ՝ կապված մեր երկրի և մեր երկրի շուրջ տեղի ունեցող իրադարձությունների հետ։ Նաև մենք հնարավորություն կունենանք եվրոպացի առաջնորդների հետ զրուցել բոլոր այն թեմաների շուրջ, որոնք հետաքրքիր են Վրաստան-ԵՄ հարաբերությունների առումով։ Մենք կխոսենք բոլոր թեմաների մասին, այդ թվում՝ մեր հիմնական արտաքին քաղաքական առաջնահերթությունը, որը Եվրամիությանն ինտեգրումն է։ Բացի այդ, կխոսենք Վրաստանում ընթացող գործընթացների, Վրաստան-ԵՄ հարաբերությունների մասին։ Դա կլինի իմ ելույթի հիմնական թեման»,- ասել է Կոբախիձեն։

Վրաստանի վարչապետը պատվիրակության հետ մասնակցում է Եվրոպական քաղաքական միության հինգերորդ գագաթնաժողովին, որի կազմում են արտաքին գործերի նախարար Իլիա Դարչիաշվիլին և կառավարության վարչակազմի ղեկավար Լևան Ժորժոլիանին։