«Շատ կարևոր է, որ Եվրոպական քաղաքական միության գագաթնաժողովի փաստաթղթում արտացոլված է Վրաստանի վերաբերյալ արձանագրությունը։ Մասնավորապես, ընդգծվել է Վրաստանի առանձնահատուկ նշանակությունը էներգետիկ կապի և ընդհանրապես տարանցման գործառույթի առումով»,- լրագրողներին ասել է Վրաստանի վարչապետ Իրակլի Կոբախիձեն։

Ինչպես նշել է կառավարության ղեկավարը, ավարտվել է Եվրոպական քաղաքական միության գագաթնաժողովը, որտեղ շատ հետաքրքիր քննարկումներ են ծավալվել։

«Քննարկումներին մասնակցել են եվրոպական տարբեր երկրների նախագահներ ու վարչապետներ։ Ընդհանուր առմամբ, շատ հետաքրքիր ֆորմատ էր։ Ես հնարավորություն ունեցա խոսելու էներգետիկ կապի թեմայի շուրջ, որն այս գագաթնաժողովում քննարկված հիմնական հարցերից էր։ Շատ կարևոր էր, որ այս գագաթնաժողովի փաստաթուղթն արտացոլում էր արձանագրված փաստը հատկապես Վրաստանի հետ կապված։ Մասնավորապես, կարևորվել է Վրաստանի առանձնահատուկ նշանակությունը էներգետիկ կապի և ընդհանուր տարանցման գործառույթների առումով։

«Մենք նաև հնարավորություն ունեցանք երկկողմանի հանդիպումներ ունենալ, զրուցել եվրոպական տարբեր երկրների մեր գործընկերների, նախագահների, վարչապետների հետ։ Ուստի՝ մենք հնարավորինս օգտագործեցինք այս ձևաչափը, որպեսզի կիսվենք այն ուղերձներով, որոնք առնչվում են Վրաստանի ազգային շահերին»,- ասել է Իրակլի Կոբախիձեն։

Նրա խոսքով, փաստաթղթում արտացոլված է Վրաստանի հատուկ գործառույթը կապի առումով։

«Մեր երկիրը մշտապես աշխատում է իր տարանցիկ գործառույթն էլ ավելի ամրապնդելու ուղղությամբ, ինչը հատկապես կարևոր է աշխարհաքաղաքական իրավիճակի լույսի ներքո, որը ձևավորվել է ուկրաինական պատերազմի սկսվելուց հետո։ Մենք ունենք բազմաթիվ ռեսուրսներ՝ ուրվագծելու մեր երկրի դերն այս հարցում, այդ թվում՝ Միջին միջանցքի նախաձեռնությունը: Այս մասին մենք խոսել ենք այս գագաթնաժողովի շրջանակներում, և հենց այս հարցը վերջապես արտացոլվել է գագաթնաժողովի փաստաթղթում»,- նշել է վարչապետը։