Վաղը Վրաստանի խորհրդարանը կգործի Վրաստանի բնակչության մեծամասնության ռացիոնալ կամքին համապատասխան և երրորդ ընթերցմամբ կընդունի օրենքը, որը դրսից կնկալվի, որպես կարևոր ներդրում բևեռացման ավարտին,- ասել է Վրաստանի վարչապետ Իրակլի Կոբախիձեն կառավարության վարչակազմում կայացած ճեպազրույցում։

Վարչապետի խոսքով՝ հնարավոր չէ, որ երկիրը մշտապես ապրի դրսով շրջապատված և արտաքին աղբյուրներից ֆինանսավորվելով, բևեռացման և արմատականության ռեժիմում:

«Ցանկանում եմ գոհունակություն հայտնել, որ երեկ և այսօր ցուցարարների կողմից բռնության աստիճանը զգալիորեն նվազել է այն բռնության համեմատ, որը մենք տեսանք նրանցից երկու և չորս շաբաթ առաջ։ Կարծում եմ՝ մեր երեկվա ճեպազրույցները, զգուշացումներն ու կոչերը դրանում իրենց դերն ունեցան։

Ուստի ևս մեկ անգամ կոչ եմ անում բոլորին զերծ մնալ բռնություններից և այլ անօրինական գործողություններից։ Ցանկանում եմ շնորհակալություն հայտնել իրավապահներին ցուցարարների բռնություններին ու անօրինական գործողություններին ամերիկյան ու եվրոպականից ավելի բարձր չափանիշով արձագանքելու համար։ Այսօր էլ նկատվել են մի քանի միջադեպեր, որոնք, թեև լիովին համապատասխանում են բռնությանը արձագանքելու ամերիկյան և եվրոպական չափանիշներին, սակայն չեն համապատասխանում 2012 թվականից հետո Վրաստանում «Վրացական երազանքի» սահմանած չափանիշներին։ Հուսով եմ, որ հետագայում կխուսափեն նման առանձին միջադեպերից»,- ասել է վարչապետը։