Վրաստանը միշտ հայտնել է իր պատրաստակամությունը և այժմ պատրաստ է նպաստել և աջակցել տարածաշրջանում կայունության և խաղաղության հաստատմանը, ինչը մեր երկրների զարգացման և բարգավաճման համար անհրաժեշտ պայման է,- Հայաստանի Հանրապետության և Վրաստանի միջև տնտեսական համագործակցության միջկառավարական համատեղ հանձնաժողովի նիստում ասել է Վրաստանի վարչապետ Իրակլի Կոբախիձեն։

Նրա խոսքով, Վրաստանը պատրաստ է այդ հարցերում համագործակցել հայ բարեկամների ու գործընկերների հետ։

«Վրաստանը և Հայաստանը հաստատակամորեն աջակցում են միմյանց ինքնիշխանությանը և տարածքային ամբողջականությանը։ Ուզում եմ ևս մեկ անգամ շնորհակալություն հայտնել Վրաստանին ցուցաբերած կայուն աջակցության համար»,- նշել է վարչապետը։

Իրակլի Կոբախիձեի խոսքով, Վրաստանի կառավարությունը շարունակում է արդյունավետորեն աշխատել ներդրումային և գործարար միջավայրի բարելավման ուղղությամբ։

«Մենք ուրախ ենք, որ Վրաստանը գրավիչ երկիր է հայ ներդրողների համար։ Անցյալ տարի Վրաստանում հայկական ներդրումներն աճել են գրեթե 40%-ով, այդ իսկ պատճառով մենք ուրախ ենք և անում ենք ամեն ինչ՝ մեր երկրում հայ ներդրողների համար առավել բարենպաստ միջավայր ստեղծելու համար։ Դրա համար մենք ունենք կոնկրետ արդյունավետ մեխանիզմներ, որոնք նախատեսված են օտարերկրյա ներդրողների համար։ Այս մեխանիզմներով մենք կկարողանանք համապատասխան օգնություն ցուցաբերել ձեր երկրից էլ ավելի մեծ թվով ներդրողների համար, եթե նման հետաքրքրություն առաջանա»,- նշել է վարչապետը։