«Որպես կառավարության ներկայացուցիչ՝ կարող եմ ձեզ խոստանալ, որ ամեն ինչ անելու ենք մեր արժեքների, պետական, ազգային շահերի պաշտպանության համար»,- ասել է Վրաստանի վարչապետ Իրակլի Կոբախիձեն Երրորդության տաճարում, որտեղ շնորհավորել է հավաքվածներին Ընտանեկան սրբության օրվա կապակցությամբ:

«Շնորհավորում եմ այսօրվա կապակցությամբ։ Ողջույն մեր սիրելի երկրի՝ Վրաստանի յուրաքանչյուր զավակ, մեր եղբայրներ և քույրեր։ Այսօր ամենակարեւոր օրն է։ Սա ընտանիքի սրբության օրն է, մեր արժեքների պաշտպանության օրն է, մեր երկրի ինքնության, ունեցվածքի, լեզվի ու հավատքի պաշտպանության օրն է։ Սա ուղղափառ եկեղեցու պաշտպանության օրն է։ Ցանկանում եմ շնորհավորել բոլորիդ այս օրվա կապակցությամբ, որը շատ հուզիչ է ձեզանից յուրաքանչյուրի համար, ով միավորեց մեր երկիրը»,- ասել է Իրակլի Կոբախիձեն։

Վարչապետի խոսքով՝ երկրի և նրա ինքնության պաշտպանությունը յուրաքանչյուրիս պարտականությունն է։ Բացի այդ, ինչպես նշել է Իրակլի Կոբախիձեն, կան ուժեր, որոնք փորձում են արհեստականորեն պառակտել հասարակությունը։

«Մենք քրիստոնեական երկիր ենք, և քրիստոնեության հիմնական արժեքը սերն է, սերը մարդկանց միջև։ Կան ուժեր, որոնք արհեստականորեն փորձում են սերը փոխարինել ատելությամբ։ Մենք պետք է ամեն ինչ անենք մեր երկիրը, մեր յուրաքանչյուր քաղաքացու սիրո շուրջ համախմբելու համար։ Սիրո շուրջ միասնությունն այն է, ինչին մեզանից յուրաքանչյուրը պետք է ձգտի: Աստված օրհնի մեր երկիրը սիրով։ Սիրով կարող ենք միավորվել նաև մեր աբխազ և օս եղբայրների ու քույրերի հետ։ Կեցցե մեր միասնական Վրաստանը, որին միավորում է հենց մարդկանց սերը։ Որպես կառավարության ներկայացուցիչ՝ կարող եմ ձեզ խոստանալ, որ մենք ամեն ինչ անելու ենք մեր արժեքները և մեր պետության, մեր երկրի ազգային շահերը պաշտպանելու համար»,- ասել է Իրակլի Կոբախիձեն։