Սալոմե Զուրաբիշվիլիի հայցն ընդդեմ թափանցիկության, հեռանկար չի ունենա ո՛չ իրավական, ո՛չ էլ որևէ այլ տեսանկյունից,- այս մասին լրագրողներին ասել է Վրաստանի վարչապետ Իրակլի Կոբախիձեն։

Ըստ Կոբախիձեի, հայցի դրական կողմն այն է, որ Սալոմե Զուրաբիշվիլին սխալ է թույլ տվել և ճանաչել Սահմանադրական դատարանի օրինականությունը։

«Կարծում եմ, որ այս դատը հեռանկար չի ունենա։ Անհնար է ուղղակի ասել, որ թափանցիկությունը վատ է, դա իրավաբանորեն սխալ է։ Այս հայցի դրական կողմն այն է, որ Սալոմե Զուրաբիշվիլին սխալ է թույլ տվել՝ ճանաչելով Սահմանադրական դատարանի օրինականությունը, այն դատարանի լեգիտիմությունը, որը Սալոմե Զուրաբիշվիլիին սահմանադրություն խախտող է ճանաչել։ Սրանով նա խոստովանեց, որ երկիրն ունի սահմանադրություն խախտող նախագահ։ Նա ինքն է ընդունում այս փաստը, ինչը շատ լավ է։ Ինչ վերաբերում է հայցին, ապա ևս մեկ անգամ կասեմ, որ թափանցիկության դեմ ներկայացված հայցը որևէ հեռանկար չի ունենա ոչ իրավական, ոչ էլ որևէ այլ տեսանկյունից»,- ասել է Իրակլի Կոբախիձեն։

Վրաստանի նախագահ Սալոմե Զուրաբիշվիլին հայց է ներկայացրել Սահմանադրական դատարան՝ պահանջելով կասեցնել և վերջնականապես չեղարկել «Օտարերկրյա ազդեցության թափանցիկության մասին» օրենքը։