«Ռուսաստանի Դաշնությունը օկուպացրել է Վրաստանի տարածքների 20 տոկոսը, սա փաստ է, ըստ էության, շահարկումների տեղ չկա»,- լրագրողներին ասել է Վրաստանի վարչապետ Իրակլի Կոբախիձեն։

Լրագրողների հարցին, թե ինչու իր զեկույցում չի նշվում, որ Ռուսաստանը օկուպանտ է, և չի նշվում Օխտոզորիա-Տատունաշվիլիի ցուցակը, վարչապետը պատասխանեց, որ զեկույցում բոլոր թեմաները քննարկված են։

«Զեկույցում քննարկվում են թեմաների մեծ մասը, իհարկե այդ թեմաները կքննարկվեն խորհրդարանական քննարկման ժամանակ։ Փաստն այն է, որ Ռուսաստանի Դաշնությունը օկուպացրել է Վրաստանի տարածքների 20 տոկոսը։ Հետևաբար, իրականում այստեղ շահարկումների տեղ չկա։ Բոլորս էլ գիտենք, թե ինչ իրավիճակ է, ինչ մարտահրավերներ կան մեր առջև։ Այս պահին, երբ երկրի տարածքների 20 տոկոսը օկուպացված է, և ինչ-որ մեկը դրսից՝ Արևմուտքից, փորձում է շանտաժի ենթարկել մեզ, շանտաժի ենթարկել մեր բնակչությանը, մեր երկրին, սա, մեղմ ասած, ուղղակի անհասկանալի է։ Մեր ժողովուրդը, մեր երկիրը արժանի է առողջ վերաբերմունքի»,- ասել է վարչապետը։