Վրաստանի վարչապետ Իրակլի Կոբախիձեն հաջողություն է մաղթել Վրաստանի ֆուտբոլի հավաքականին Եվրոպայի առաջնությունում։

Ինչպես կառավարության նիստում ասել է Իրակլի Կոբախիձեն, Վրաստանն ունի հպարտանալու խաղացողներ։

«Վաղը Վրաստանի հավաքականը կսկսի մրցելույթները Եվրոպայի առաջնությունում։ Սա այն օրն է, որին մեզանից յուրաքանչյուրը սպասել է երկար տարիներ և առավել ինտենսիվ վերջին երեք ամիսների ընթացքում՝ Եվրոպայի առաջնության ուղեգիր նվաճելուց հետո։ Պատմության մեջ առաջին անգամ վաղը ֆուտբոլի Եվրոպայի առաջնությունում կբարձրացվի Վրաստանի դրոշը և կհնչի Վրաստանի օրհներգը։ Այս ամենը անհավանական հույզ է մեզանից յուրաքանչյուրի, երկրպագուների, յուրաքանչյուր վրացու համար։ Շատ կարևոր է նաև, որ յուրաքանչյուր հանդիպմանը ներկա կլինի ավելի քան 10000 վրացի երկրպագու, դրանում մենք համեստ ներդրում ունեցանք՝ սուբսիդավորելով թռիչքները։ Ուրախ եմ, որ այս նախագիծը մեծ հաջողություն ունեցավ, տոմսի արժեքը 195 եվրո էր, ինչը երկրպագուների համար հեշտացնում էր մեկնել Գերմանիա և ներկա լինել խաղերին:

Հաջողություն եմ մաղթում տղաներին։ Վստահ եմ, որ նրանք Եվրոպայի առաջնությունում կխաղան նույն նվիրումով, ինչ Եվրոպայի առաջնության ուղեգիր նվաճելու ժամանակ։  Մենք ունենք խաղացողներ, որոնցով պետք է հպարտանանք, և ես ցանկանում եմ նրանց ամենայն բարիք մաղթել, ամենակարևորը՝ դուրս գալ խմբից։ Համոզված ենք, որ իրենց վճռականությամբ նրանք անպայման կկարողանան հասնել այս կարևոր հաջողությանը»,- ասել է Իրակլի Կոբախիձեն։

Վրաստանի հավաքականը Եվրոպայի առաջնությունում առաջին հանդիպումը կանցկացնի հունիսի 18-ին Թուրքիայի ընտրանու հետ։ Հանդիպումը կմեկնարկի Թբիլիսիի ժամանակով 20:00-ին Դորտմունդի «BVB Arena»-ում։