«Ակտիվորեն կաշխատենք դիստրիբյուտորական ընկերությունների և սուպերմարկետների ցանցերի ներկայացուցիչների հետ, որպեսզի մեր համաքաղաքացիների համար կարողանանք հասնել գների նվազեցմանը։ Անհրաժեշտության դեպքում կօգտագործենք տարբեր երկրներում փորձարկված հակամենաշնորհային մեխանիզմներ», – այս մասին հայտնել է Վրաստանի վարչապետ Իրակլի Կոբախիձեն՝ սպառողական գների վերաբերյալ հրապարակված տեսաուղերձում։

Կառավարության ղեկավարը իրավապահ մարմիններին կոչ է արել խորությամբ ուսումնասիրել հարցը։

«Կոչ եմ անում իրավապահ մարմիններին՝ խորությամբ ուսումնասիրել այս հարցը և պարզել՝ արդյոք առանձին սուբյեկտների գործունեության մեջ կան հանցագործության հատկանիշներ։ Միաժամանակ ուզում եմ դիմել Վրաստանի խորհրդարանին՝ ստեղծել խորհրդարանական հանձնաժողով, որը կօգտագործի համապատասխան խորհրդարանական գործիքներ այս խնդրի գնահատման համար», – նշել է Իրակլի Կոբախիձեն։