Շատ կարևոր կլինի Սուլխան Թամազաշվիլիի գործունեությունը Աջարիայի ինքնավար հանրապետության կառավարության նախագահի պաշտոնում, – այս մասին հայտարարել է Վրաստանի վարչապետ Իրակլի Կոբախիձեն՝ ներկայացնելով Աջարիայի կառավարության նախագահի թեկնածուին։

Կառավարության ղեկավարն իր խոսքում շնորհակալություն է հայտնել Թորնիկե Ռիժվաձեին կատարված աշխատանքի համար և ընդգծել, որ վերջին տարիներին Աջարիայում իրականացվել են չափազանց կարևոր նախագծեր, որոնք արժանի շարունակություն են պահանջում։

«Թորնիկე Ռիժվաձեն յոթ տարի ծառայել է Աջարիայի ինքնավար հանրապետությանը՝ մեր երկրի այս կարևորագույն տարածաշրջանին։ Վերջին տարիների ընթացքում Աջարիայի համար շատ բան է արվել, իրականացվել են կարևորագույն ծրագրեր և նախագծեր՝ տարածաշրջանի զարգացման նպատակով։ Իհարկե, այս գործն արժանի շարունակություն է պահանջում։ Մենք ձեզ ներկայացնում ենք շատ արժանի թեկնածու՝ Սուլխան Թամազաշվիլիին, ով տարիներ շարունակ աշխատել է շատ կարևոր կառույցում՝ ՆԳՆ-ում, և արժանապատվորեն ծառայել մեր պետությանը։ Նա աջարացի է՝ ծնվել և մեծացել է Աջարիայում, և իր գործունեությունը Աջարիայի կառավարության նախագահի պաշտոնում, անկասկած, շատ կարևոր կլինի։ Նա ունի փորձ, համապատասխան հմտություններ՝ իր աշխատանքն արդյունավետ իրականացնելու համար, ինչը ուղղված կլինի Աջարիայի ինքնավար հանրապետության զարգացմանը։ Մեր առջև կան բազմաթիվ մարտահրավերներ, և ես վստահ եմ, որ Սուլխան Թամազաշվիլին դրանք լավագույն կերպով կհաղթահարի», – հայտարարել է վարչապետ Կոբախիձեն։