Ցանկանում եմ բոլորին խոստանալ Վրաստանի կառավարության անունից, որ իշխանությունը մինչև վերջ կկանգնի մեր ավանդական արժեքների և ազգային շահերի պաշտպանության առաջնագծում։ Շնորհավորում եմ բոլորին այսօրվա օրը, – այս խոսքերով Վրաստանի վարչապետ Իրակլի Կոբախիձեն դիմեց Սուրբ Սամեբայի տաճարում հավաքվածներին, որտեղ ներկա էր Ընտանիքի սրբության և ծնողների հարգանքի օրվան նվիրված աղոթքին։

Վարչապետը ընդգծեց վրացական հասարակության միասնականության կարևորությունը ավանդական արժեքների շուրջ և նշեց, որ կան ուժեր, որոնք հակադրվում են այս ամենին՝ ստեղծելով կեղծ գաղափարախոսություններ և արժեքներ։ Նա հավելեց, որ իշխանության պարտքն է, Մայր եկեղեցու կողքին, պայքարել ազգային արժեքների պաշտպանության համար։

«Շնորհավորում եմ բոլորին այսօրվա օրը՝ Ընտանիքի սրբության և ծնողների հարգանքի օրը։ Շատ կարևոր է, որ այսօր միասին են կանգնած եկեղեցին և պետությունը, հոգևորականությունը և ժողովուրդը։ Այսօր ամբողջ վրացական հասարակությունը համախմբված է ազգային և ավանդական արժեքների շուրջ։

Ցանկանում եմ շնորհակալություն հայտնել կաթողիկոս-պատրիարք Իլիա Երկրորդին, որը սահմանել է այս կարևորագույն օրը մեր երկրում։ Շնորհակալություն եմ հայտնում նաև պատրիարքական գահակից Շիոյին, որը առաջնորդեց այս երթը։

Կրկին ցանկանում եմ ընդգծել միասնականության կարևորությունը։ Շնորհավորում եմ բոլոր նրանց, ովքեր միացան այսօրվա երթին։ Շատերն այսօր երթին չէին մասնակցում, բայց հոգով ու սրտով աջակցում էին։ Մենք պետք է սիրով հիշենք նաև նրանց, ովքեր իրենց տեսակետի պատճառով չմիացան։ Թող նրանք ևս ապագայում կիսեն այս արժեքները և, գուցե, հաջորդ տարի մասնակցեն երթին։

Պայքարը ավանդական արժեքների համար շարունակվում է։ Այս պայքարը հեշտ չէ։ Կան հզոր ուժեր, որոնք պայքարում են ավանդական արժեքների դեմ՝ ստեղծելով կեղծ գաղափարախոսություններ։ Մեր պարտքն ու պատասխանատվությունն է՝ Մայր եկեղեցու կողքին կանգնել և պաշտպանել մեր ազգային արժեքները», – հայտարարել է Վրաստանի վարչապետը։