Հիշու՞մ եք, մեր քաղաքական ընդդիմախոսները կանխատեսում էին տնտեսական ճգնաժամ Վրաստանում և փորձում էին նման ընկալում ստեղծել հանրության մեջ, թե երկիրը գնում է դեպի տնտեսական ճգնաժամ, – այս մասին Վրաստանի վարչապետ Իրակլի Կոբախիձեն հայտարարել է կառավարության այսօրվա նիստում։

«Ուզում եմ հիշել նրանց ներկայացուցիչներից մեկի մեկնաբանությունը, ով հունվարի 17-ին ասում էր, որ երեք ամսում դոլարի նկատմամբ փոխարժեքը կլինի մոտ 3.1։ Անցել է երեք ամիս, մի փոքր էլ ավելի, և լարիի փոխարժեքը մոտ 2.75 է։ Տնտեսության 2 տոկոսանոց անկում էր կանխատեսվում մի նախկին քաղաքական գործչի և ներկայումս արդեն փորձագետի կողմից։ Ինչպես արդեն ասվեց, առաջին եռամսյակում ունենք 9.3% տնտեսական աճ, ինֆլյացիա՝ 6%։ Նման էր կանխատեսումը։ Ասվում էր նաև, որ հարկային եկամուտների պլանը չի կատարվի, սակայն, ինչպես տեսնում եք, առաջին եռամսյակում այդ պլանը գերակատարվել է ավելի քան 120 միլիոն լարիով», – նշել է Կոբախիձեն։

Նրա խոսքով՝ շատ ցավալի է, որ որոշ մարդիկ լիովին գիտակցված փորձում են երկրում ստեղծել բացասական սպասումներ և տարածել նիհիլիզմ։

«Սա ունի կոնկրետ քաղաքական պատճառներ։ Սա է պատվերը, որը կատարում են որոշ մարդիկ՝ մեր քաղաքական ընդդիմախոսները։ Բարեբախտաբար, նրանց կանխատեսումները չեն իրականանում, և նրանց ծրագրերը չեն իրականացվում։ Մենք ամեն ինչ կանենք, որպեսզի արդարացնենք ոչ թե այդ մարդկանց, այլ մեր հասարակության սպասումները։ Մեր հասարակության շահերից է բխում, որպեսզի տնտեսությունը զարգանա հնարավորինս արագ, ստեղծվեն նոր աշխատատեղեր, աճի աշխատողների աշխատավարձը, ունենանք բարձր մակարդակի ֆինանսական կոնսոլիդացիա։ Բոլոր ուղղություններով մենք ջանք չենք խնայի, որպեսզի տնտեսական աճի առաջընթացը շարունակվի», – հայտարարել է Իրակլի Կոբախիձեն։