Իրակլի Կոբախիձե. Այսօրվա օրը նշան է, որ երկիրն ու ժողովուրդը հաստատակամորեն կանգնած են արժեքների պահպանության առաջնագծում, թեև որոշ ուժեր փորձում էին պարտադրել աղճատված գաղափարախոսություն
Ցանկանում եմ բոլորին շնորհավորել այսօրվա օրը։ Տեսնում եք, ինչպիսի միասնություն է, և ամենակարևորը՝ մարդիկ միավորված են սիրո գաղափարի և ավանդական արժեքների հանդեպ հավատարմության գաղափարի շուրջ, – այս մասին հայտարարել է Վրաստանի վարչապետ Իրակլի Կոբախիձեն՝ Ընտանիքի սրբության և ծնողների հարգանքի օրվան նվիրված երթի ընթացքում լրագրողների հետ զրույցում։
Նրա խոսքով՝ չնայած որոշ ուժեր փորձել են վրացական հասարակությանը պարտադրել արհեստական և աղճատված գաղափարախոսություն, այդ պայքարում հաղթանակ է տարել վրաց ժողովուրդը։
«Մեզ անհրաժեշտ է միասնություն արժեքների շուրջ, և մենք կրկին պետք է շնորհակալություն հայտնենք մեր կաթողիկոս պատրիարքին՝ այս օրը սահմանելու համար։ Շնորհակալություն պետք է հայտնենք նաև պատրիարքական գահակից Շիոյին, որը գլխավորում է այսօրվա երթը։ Սա չափազանց կարևոր օր է յուրաքանչյուրիս, յուրաքանչյուր վրացու և մեր երկրի յուրաքանչյուր քաղաքացու համար։ Այս օրը նշան է այն բանի, որ մեր երկիրը, մեր ժողովուրդը ուժեղ և հաստատուն է, և հասարակությունը ամուր պաշտպանում է արժեքները։ Դուք գիտեք, որ տարբեր երկրներում գոյություն ունեն բավականին խնդրահարույց միտումներ, որոնք ամբողջությամբ արհեստական են։ Որոշ ուժեր փորձել են նման արհեստական, աղճատված գաղափարախոսություն պարտադրել նաև մեր երկրին և հասարակությանը, սակայն տեսնում եք, որ այս պայքարում հաղթանակ տարավ վրաց ժողովուրդը։ Վրացական հասարակությունը հաստատուն կերպով պաշտպանում է հենց ավանդական արժեքները՝ այն արժեքները, որոնց վրա պատմականորեն հիմնված է մեր երկիրը և մեր ժողովուրդը», – նշել է վարչապետը։