Երբ Եվրամիության դեսպանը սպառնում է վրաց ժողովրդին քաղաքացիական պատերազմով և աղքատացմամբ, դա պարզապես անհավանական է,- լրագրողներին ասել է Վրաստանի վարչապետ Իրակլի Կոբախիձեն։

Իրակլի Կոբախիձեի խոսքով՝ Եվրամիության դեսպանը գտնվում է ողբերգական իրավիճակում, երբ ստիպված է սպառնալիքներ հնչեցնել վրաց ժողովրդի հասցեին։

«Ինձ համար դժվար է նույնիսկ գնահատել այս հայտարարությունը։ Երբ Եվրամիության դեսպանը սպառնում է վրաց ժողովրդին քաղաքացիական պատերազմով և աղքատացմամբ, դա պարզապես անհավանական է։ Անհնար է գնահատել սա։ Ես ևս մեկ անգամ ընդգծում եմ, որ դեսպանը, ցավոք, գտնվում է ողբերգական իրավիճակում, երբ ստիպված է նման սպառնալիքներ հնչեցնել վրաց ժողովրդի հասցեին, սա ինքնին խոսում է նրա դժվարին վիճակի մասին», – ասել է Իրակլի Կոբախիձեն։

Վրացական մի քանի լրատվամիջոցներ հաղորդել են Վրաստանում Եվրամիության դեսպան Պավել Հերչինսկու՝ Բրյուսելում Եվրոպական արտաքին գործողությունների ծառայությունում կայացած միջոցառման ժամանակ արված հայտարարության մասին, ըստ որի նա ասել է. «Վրաստանը գտնվում է խաչմերուկում, Վրաստանի ապագան դեռ չի գրվել, բայց այն, ինչ կորոշվի առաջիկա շաբաթներին և ամիսներին, կորոշի, թե արդյոք Վրաստանը պատկանում է ժողովրդավարության, օրենքի գերակայության և մարդու իրավունքների վրա հիմնված եվրոպական երկրների ընտանիքին, թե, ցավոք, կվերադառնա իր մութ անցյալին»։ Հերչինսկին նաև նշել է. «Մենք չպետք է թույլ տանք, որ Վրաստանը և հրաշալի, ջերմ, հյուրընկալ վրաց ժողովուրդը վերադառնան բռնության, քաղաքացիական պատերազմի, աղքատության, դժվարությունների և կոռուպցիայի մութ ժամանակներին»։