Անակլիայի նավահանգստի կառուցումը լինելու է մեր կառավարության գլխավոր առաջնահերթություններից մեկը,- այս մասին հայտարարել է վարչապետի թեկնածու Իրակլի Կոբախիձեն՝ ընդդիմության հետ հանդիպմանը կառավարության ծրագիրը ներկայացնելիս։

Նրա խոսքով, աշխատանքներն արդեն սկսվել են, այս տարի կընտրվի մասնավոր ընկերություն, որը կղեկավարի այդ աշխատանքները։

«Ինչ վերաբերում է նավահանգիստներին, ապա Անակլիայի նախագծի պատշաճ մեկնարկն ու իրականացումը հատուկ մտահոգության առարկա է լինելու։ Աշխատանքներն արդեն սկսվել են, այս տարի այս աշխատանքները կղեկավարի մասնավոր ընկերություն։ Նաև, ինչպես գիտեք, այս նախագծում պետությունը նախատեսում է բազմամիլիոնանոց ներդրումներ։ Ամեն ինչ կարվի ըստ պլանի։ Անակլիայի նավահանգստի կառուցումը լինելու է մեր կառավարության գլխավոր առաջնահերթություններից մեկը. Սրան զուգահեռ պատշաճ ուշադրություն է դարձվելու այլ նավահանգիստների զարգացմանն ու ռեսուրսների հզորացմանը։ Սա հատկապես վերաբերում է Փոթի նավահանգստի զարգացմանը, ռեսուրսների հզորացմանը։ Նաև կշարունակվեն ակտիվ աշխատանքները սևծովյան էլեկտրահաղորդման մալուխի նախագծի վրա»,- ասել է Իրակլի Կոբախիձեն։