Իրակլի Կոբախիձե. Ամեն ինչ պետք է անել վրացական հասարակությունն ուժեղացնելու, առողջ քաղաքացիական հասարակության ձևավորմանը նպաստելու համար, ոչ թե արհեստական կեղծ էլիտաների
Պետք է ամեն ինչ անել վրացական հասարակության, նրա սոցիալական կառուցվածքի ամրապնդման համար, նպաստելու ոչ թե արհեստական կեղծ էլիտաների, այլ առողջ քաղաքացիական հասարակության ձևավորմանը,- ասել է Վրաստանի վարչապետի թեկնածու Իրակլի Կոբախիձեն՝ խորհրդարանի լիագումար նիստում։
Կոբախիձեի խոսքով, միայն կառուցվածքային կազմակերպված հասարակությունը կարող է ապահովել վրացական պետության առջեւ ծառացած խնդիրների ամենաարդյունավետ լուծումը։
«Այս նպատակին հասնելու համար առանձնահատուկ դեր պետք է ունենան կրթության, գիտության և երիտասարդության, մշակույթի և սպորտի նախարարությունները։ Անհրաժեշտ է ավելի շատ ռեսուրսներ ներդնել կրթության, գիտության, մշակույթի և սպորտի զարգացման, երիտասարդներին խթանելու համար։ Մենք պետք է հատուկ ուշադրություն դարձնենք ուսուցիչներին, բժիշկներին, մեր հասարակության մյուս կարկառուն ներկայացուցիչներին։ Համապատասխան պետական որոշումները պետք է ընդունվեն ոլորտի ներկայացուցիչների հետ սերտ խորհրդակցության հիման վրա: Սա Վրաստանում իրական քաղաքացիական հասարակություն ստեղծելու ամենաճիշտ ճանապարհն է»,- նշել է Իրակլի Կոբախիձեն։