Ելնելով այն հանգամանքից, որ Եվրամիության սահմանած 12 կետերի կատարումը մեզ համար առանձնահատուկ առաջնահերթություն է, որպես բացառություն, մենք աչք կփակենք իրավական սկզբունքների վրա և կընդունենք գլխավոր դատախազին առանց որևէ նախապայմանի ընտրելու նոր օրենքը,- հայտարարել է «Վրացական երազանք» կուսակցության նախագահ Իրակլի Կոբախիձեն։

Ինչպես նշել է Իրակլի Կոբախիձեն, արմատական ​​ընդդիմության սաբոտաժի ֆոնին «Վրացական երազանքն» ակտիվորեն աշխատում է Եվրամիության սահմանած 12 կետերի կատարման ուղղությամբ։

«Վրաստանի գլխավոր դատախազի ընտրության կարգի վերանայումը նշված 12 կետերի մեջ է մտնում։ Այս վերապահումն իրականացնելու համար երեկ խորհրդարանական մեծամասնությունը պաշտոնապես նախաձեռնեց սահմանադրական օրենքի նախագիծը՝ այն ճշգրիտ բովանդակությամբ, որը համաձայնեցվել էր անցյալ տարի մեծամասնության և խորհրդարանական ընդդիմության միջև կայացած խորհրդակցությունների հիման վրա։ Օրենքի նախագծի համաձայն՝ հաջորդ երկու գումարումների խորհրդարանը ձայների 3/5-ի մեծամասնությամբ վեց տարի ժամկետով կընտրի Վրաստանի գլխավոր դատախազին, իսկ եթե թեկնածուն չստանա ձայների 3/5-ը, ապա՝ Գլխավոր դատախազը կընտրվի ձայների մեծամասնությամբ, բայց մեկ տարի ժամկետով։

Խորհրդարանական ընդդիմության հետ համաձայնեցված այս օրենքի նախագիծը նմանը չունի աշխարհի ոչ մի երկրում։ Սա մի պարզ պատճառ ունի՝ դրա բովանդակությունը հակասում է կառավարման համակարգի տրամաբանությանը և տարրական իրավական սկզբունքներին, որոնց այսօր չենք անդրադառնա։

Կհիշենք միայն, որ նշված պատճառով, մեր որոշմամբ, նախորդ տարի դադարեցվել էր համապատասխան սահմանադրական փոփոխությունների ընդունումը։ Բայց քանի որ Եվրամիության սահմանած 12 կետերի կատարումը մեզ համար առանձնահատուկ առաջնահերթություն է, որպես բացառություն, մենք աչք կփակենք իրավական սկզբունքների վրա և կընդունենք գլխավոր դատախազին առանց որևէ նախապայմանի ընտրելու նոր օրենքը»,- ասել է Կոբախիձեն։