Վրաստանի պատմության մեջ առաջին անգամ հիմք է դրվել միջազգային օդանավակայանի ամենաբարձր կարգի թռիչքուղու կառուցմանը,- ասել է Վրաստանի օդանավակայանների միության գլխավոր տնօրեն Իրակլի Քարքաշաձեն։

Նրա խոսքով, նոր թռիչքուղու կառուցումը կնպաստի օդանավակայանի մոտ լոգիստիկ կենտրոնի և բեռների տերմինալի զարգացմանը։ Նաև ապագայում մեծ չափերի (wide body) ինքնաթիռներ ստանալը Քութաիսիի օդանավակայանին հնարավորություն կտա ավելացնել նոր օդային երթուղիներ երկար հեռավորություններից։

«Այսօր նոր փուլ է սկսվում ոչ միայն Քութաիսիի միջազգային օդանավակայանի, այլեւ վրացական ավիացիայի պատմության մեջ։ Վրաստանի վեց օդանավակայաններից չորսում միաժամանակ սկսվում են լայնածավալ ենթակառուցվածքային ծրագրեր, նոր տերմինալներ կկառուցվեն Թելավիում և Մեստիայում։ Իսկ Քութաիսիում սկսվում է թռիչքուղու և օդանավակայանի ենթակառուցվածքների շինարարությունը։

Նոր ենթակառուցվածքով, որի հիմքը դրվել է այսօր, օդանավակայանը կհասնի 5 միլիոն ուղևորի նշագծին։ Մենք ունենք ավիացիոն բիզնեսի կայուն աճ, ինչը հանգեցրեց համաշխարհային կարգի բազմաթիվ ավիաընկերությունների մուտքին մեր օդանավակայաններ»,- ասել է Իրակլի Քարքաշաձեն։

«Նշված նախագծի ներդրումային արժեքը աննախադեպ մեծ է՝ մինչև 240 մլն լարի, իսկ ընդհանուր առմամբ՝ 40 մլն լարիով ավելի, քան 2012-2024 թվականներին Քութաիսիի միջազգային օդանավակայանում կատարված կապիտալ ծախսերը։

«Նոր, 3,5 կմ երկարությամբ թռիչքուղու և օդանավակայանի ենթակառուցվածքի կառուցումը Քութաիսիի միջազգային օդանավակայանի ընդհանուր զարգացման պլանի առաջին փուլի մասն է կազմում, որը վերջերս ավարտեց աշխարհի ամենաազդեցիկ ավիացիոն խորհրդատվական ընկերություններից մեկը՝ «IATA Consulting»-ը։ Նախագիծը, որի ավարտը նախատեսվում է 2026 թվականի գարնանը, կիրականացնի «Անագի» շինարարական ընկերությունը։ Դրանից հետո Քութաիսիի միջազգային օդանավակայանը կլինի Վրաստանի միակ օդանավակայանը, որն առանց սահմանափակումների կկարողանա ընդունել խոշոր ինքնաթիռներ։ Այսօր Քութաիսիի միջազգային օդանավակայանը գործում է D ծածկագրով, նրա թռիչքուղու երկարությունը 2,5 կմ է, որն ապահովում է միջին չափի օդանավերի շահագործումը»,- նշվում է Օդանավակայանների միության տեղեկատվության մեջ։