Սեպտեմբերի 27-ից չինական ամենախոշոր «China Southern Airlines» ավիաընկերությունը ամենօրյա չվերթներ կիրականացնի Թբիլիսի-Ուրումչի-Թբիլիսի ավիաուղիով։ Պանդեմիայից հետո ավիաընկերությունը վերադարձել է վրացական շուկա 2023 թվականի հունվարին և այս փուլում թռիչքներ է իրականացնում շաբաթական երեք անգամ։

Վրաստանի օդանավակայանների միության գլխավոր տնօրեն Իրակլի Քարքաշաձեի խոսքով, Վրաստանից Չինաստանի քաղաքացիների համար առանց վիզայի ռեժիմի սահմանումը և ամենօրյա ավիաչվերթերը կօգնեն նոր զբոսաշրջային հոսքեր առաջացնել։

«Մեր համատեղ աշխատանքի արդյունքում պայմանավորվածություն է ձեռք բերվել չինական խոշորագույն «China Southern» ավիաընկերության հետ՝ Ուրումչի-Թբիլիսի ուղղությամբ հաճախականությունները 3-ից հասցնելով 7-ի։ Սա էապես կնպաստի երկիր զբոսաշրջային նոր հոսքերի ներգրավմանը և մեր շուկայում ասիական ավիաընկերությունների մասնաբաժնի ավելացմանը։ Մեր հաջորդ խնդիրն է աստիճանաբար մեծացնել թռիչքների տարածքը նաև Չինաստանի այլ քաղաքներից»,- ասել է Իրակլի Կարկաշեն։

«China Southern Airlines»-ը հունվար-օգոստոս ամիսներին սպասարկել է 75 չվերթ և 17 833 ուղևորի Ուրումչի-Թբիլիսի-Ուրումչի ուղղությամբ։

Վրաստանի կառավարության որոշմամբ՝ սեպտեմբերի 11-ից Չինաստանի քաղաքացիները կարող են մուտք գործել Վրաստան առանց վիզայի։ Սեպտեմբերի 27-ից նախատեսված ամենօրյա չվերթերով, ըստ նախնական կանխատեսման, մինչև տարեվերջ ուղեւորահոսքը կաճի մինչեւ 23 հազար։