Մենք ստանձնել ենք Ադրբեջանի և Հայաստանի միջև միջնորդի գործառույթը, երկու երկրների հետ էլ վստահելի հարաբերություններ ենք պահպանում, դա մեզ հույս և հնարավորություն է տալիս, որ հակամարտությունը թուլանա,- այս մասին հայտարարել է խորհրդարանի ընթացակարգային հարցերի հանձնաժողովի նախագահ Իրակլի Քադագիշվիլին։

Ինչպես Վրաստանի Առաջին ալիքին ասել է Քադագիշվիլին, Վրաստանը երկու կողմերի նկատմամբ բարիդրացիական և արդարացի դիրքորոշում է ցուցաբերում։

«Ռուսաստանի Ուկրաինա ներխուժումից ի վեր Վրաստանի կառավարությունը ճիշտ դիրքորոշում է որդեգրել և ժամանակը ցույց կտա, որ դա ճիշտ դիրքորոշում էր, երբ մենք լիակատար համերաշխություն հայտնեցինք Ուկրաինային և աջակցեցինք նրան բոլոր մակարդակներում: Սակայն, միևնույն ժամանակ, մենք ոչ մեկին թույլ չտվեցինք Վրաստանը դարձնել այս ռազմական հակամարտության մասնակից։

Հայաստանի և Ադրբեջանի միջև կտրուկ էսկալացիա է: Ըստ տեղեկատվության՝ Հայաստանը դիմել է Ռուսաստանին՝ կիրառելու հավաքական պաշտպանության ուժերը։ Հայկական կողմն ասում է, որ երկու երկրների սահմանին ռազմական գործողություններ են ընթանում։ Սա մեծացնում է լարվածությունը: Այս գործընթացում առավել կարևոր է, որ մենք պահպանենք խաղաղության կղզին Կովկասում և Սև ծովի ափին, մենք պետք է պահպանենք այս իրավիճակը։ Մենք ստանձնեցինք որոշակի միջնորդի գործառույթ Ադրբեջանի և Հայաստանի միջև, երբ վարչապետի մասնակցությամբ տեղի ունեցավ գերիների փոխանակում և ականապատ տարածքների ականազերծում։ Մենք վստահելի հարաբերություններ ենք պահպանում երկու երկրների հետ։ Դա մեզ հույս և հնարավորություն է տալիս, որ հակամարտությունը թուլանա: Մենք բարիդրացիական, արդարացի դիրքորոշում ունենք երկու կողմերի նկատմամբ։ Ղարաբաղյան վերջին պատերազմի ժամանակ մենք ոչ մի ռազմական նախապատվություն չենք տվել կողմերին, քանի որ երկուսն էլ մեր հարևաններն են, և մենք նրանց նկատմամբ բարիդրացիական քաղաքականություն ենք վարում։ Չնայած այն հանգամանքին, որ մեր շուրջը թեժ և կործանարար պատերազմ է ընթանում, մենք պետք է հաջողության հասնենք և տարածաշրջանում հաստատենք խաղաղության»,- ասել է Իրակլի Քադագիշվիլին։