Վրաստանի վարչապետ Իրակլի Ղարիբաշվիլին հանդիպել է Եվրոպայի խորհրդի մարդու իրավունքների պաշտպանության հանձնակատար Դունյա Միատովիչի հետ։

Վարչապետի մամուլի ծառայությունից հայտնում են, որ կառավարության աշխատակազմում տեղի ունեցած խորհրդակցությանը քննարկվել են մարդու իրավունքների պաշտպանության ազգային մեխանիզմների ամրապնդման ուղղությամբ Վրաստանի կառավարության ձեռնարկած քայլերը։

Ինչպես նշել է վարչապետը, Վրաստանը հավատարիմ է մարդու հիմնարար իրավունքներին և ազատություններին, որոնք երաշխավորված են Վրաստանի Սահմանադրությամբ։

Իրակլի Ղարիբաշվիլիի խոսքով՝ մի քանի ամիս առաջ Վրաստանի խորհրդարանն ընդունել է Վրաստանում մարդու իրավունքների պաշտպանության 2022-2030 թվականների ազգային ռազմավարությունը, որը կոչված է արձագանքելու ազգային կարիքներին և մարտահրավերներին։ Ռազմավարությունը հիմնված է Վրաստանի Սահմանադրության վրա և մեծ ուշադրություն է դարձնում մարդու իրավունքների միջազգային չափանիշներին, ինչպես նաև ՄԱԿ-ի կայուն զարգացման նպատակներին։

Նշվել է, որ կառավարության գլխավոր առաջնահերթություններից է բոլոր քաղաքացիների համար առողջ միջավայրի ապահովումը, և այս ուղղությամբ իրականացվել են մի շարք կարևոր բարեփոխումներ։

Զրույցում անդրադարձ է կատարվել 2012 թվականից հետո մարդու իրավունքների պաշտպանության ոլորտում գրանցված առաջընթացին։ Նշվեց, որ վերջին 10 տարում իրավիճակը բարելավվել և արմատապես փոխվել է այս առումով։

Ուշադրություն է դարձվել Մարդու իրավունքների խորհրդի աշխատանքի արդյունավետությանը։

Զրույցի ընթացքում անդրադարձ է եղել նաև Վրաստանի օկուպացված շրջաններում տիրող հումանիտար և մարդու իրավունքների ծանր իրավիճակին։ Կառավարության ղեկավարը շնորհակալություն է հայտնել Դունյա Միատովիչին՝ Վրաստանի տարածքային ամբողջականությանն ու ինքնիշխանությանը աջակցելու համար և ևս մեկ անգամ հաստատել Վրաստանի կառավարության հավատարմությունը հակամարտությունների կարգավորման խաղաղ քաղաքականությանը։

Տեղեկությունը տարածում է Վրաստանի վարչապետի մամուլի գրասենյակը։