Վրաստանի վարչապետ Իրակլի Ղարիբաշվիլին հանդիպել է ՄԱԿ-ի գլխավոր քարտուղար Անտոնիո Գուտերեշի հետ։
Վարչապետի մամուլի ծառայությունից հայտնում են, որ ՄԱԿ-ի Գլխավոր ասամբլեայի շրջանակներում կայացած հանդիպմանը կողմերը քննարկել են կայուն զարգացման ուղղությամբ ՄԱԿ-ի ձեռնարկած կարևոր քայլերը։
«Կառավարության ղեկավարը նշել է, որ Վրաստանը պաշտպանում է ՄԱԿ-ի գլխավոր քարտուղարի առաջարկած պայմանագրերը, որոնց նպատակն է ավելի լավ հարմարեցնել ՄԱԿ-ը առկա և սպասվող մարտահրավերներին։
Իրակլի Ղարիբաշվիլիի խոսքերով, Վրաստանը բարձր է գնահատում Անտոնիո Գուտերեշի ջանքերը «խաղաղության նոր օրակարգի» մշակման գործում, որը հիմնված է միջազգային իրավունքի հիմնարար սկզբունքների և ՄԱԿ-ի կանոնադրության վրա»,- նշվում է Վարչապետի մամուլի ծառայության տարածած հաղորդագրության մեջ։
Ըստ նրանց հաղորդագրության, քննարկված հարցերի թվում են եղել աշխարհում անվտանգության միջավայրն ու մարտահրավերները, Վրաստանի օկուպացված տարածքներում անվտանգության և մարդասիրական ծանր իրավիճակը, ինչպես նաև ՄԱԿ-ի ներգրավվածությունը հակամարտությունների խաղաղ կարգավորման գործընթացում։
«Ինչպես նշել է Իրակլի Ղարիբաշվիլին, Ուկրաինայի ներկայիս պատերազմի արդյունքում փոխվել է միջազգային անվտանգության ճարտարապետությունը, և կլիմայի փոփոխության ազդեցությունը և դրանից բխող ռիսկերը նույնպես կարևոր մարտահրավեր են։ Առկա մարտահրավերները հաղթահարելու համար անհրաժեշտ է միասնական ջանքերով աշխատել։ Խոսելով Վրաստանի օկուպացված շրջաններում տիրող իրավիճակի մասին՝ վարչապետը նշել է, որ ՄԱԿ-ի շրջանակներում ընդունված զեկույցներն ու բանաձեւերը կարևոր մեխանիզմներ են օկուպացված տարածքներում ծանր հումանիտար իրավիճակը միջազգային օրակարգում պահպանելու համար։
Հանդիպմանը Իրակլի Ղարիբաշվիլին հաստատել է Վրաստանի կառավարության հավատարմությունը հակամարտության խաղաղ կարգավորման քաղաքականությանը։ Նա ՄԱԿ-ի գլխավոր քարտուղարին տեղեկացրել է այդ ուղղությամբ Վրաստանի կառավարության կողմից գործադրվող ջանքերի մասին և շնորհակալություն հայտնել հակամարտությունների խաղաղ կարգավորման գործընթացում աջակցության և ներգրավվածության համար։
Վարչապետը շնորհակալություն է հայտնել Միավորված ազգերի կազմակերպության գլխավոր քարտուղարին՝ Վրաստանի ինքնիշխանությանն ու տարածքային ամբողջականությանը ցուցաբերած անմնացորդ աջակցության համար»,- ասված է վարչապետի մամուլի ծառայության հաղորդագրության մեջ։
Ըստ նրանց, քննարկվելիք հարցերի թվում են եղել անվտանգության միջավայրն ու մարտահրավերները հարավկովկասյան տարածաշրջանում։ Իրակլի Ղարիբաշվիլին նշել է, որ Վրաստանը միշտ պատրաստ է նպաստել տարածաշրջանում խաղաղության և կայունության ապահովմանը։
