Իրակլի Ղարիբաշվիլին հանդիպել է Կովկասյան բանակցությունների և Ժնևի միջազգային քննարկումների հարցերով ԱՄՆ-ի Պետքարտուղարության գլխավոր խորհրդականի հետ
Վրաստանի վարչապետ Իրակլի Ղարիբաշվիլին հանդիպել է Կովկասյան բանակցությունների և Ժնևի միջազգային քննարկումների հարցերով ԱՄՆ-ի Պետքարտուղարության գլխավոր խորհրդականի հետ։ Տեղեկությունը տարածում է վարչապետի մամուլի ծառայությունը։
Նրանց հաղորդմամբ, Իրակլի Ղարիբաշվիլին շնորհավորել է Ֆիլիպ Ռիկերին նոր պաշտոնի կապակցությամբ և հաջողություն մաղթել հետագա աշխատանքում։
Վարչապետի խոսքով՝ Վրաստանը ԱՄՆ-ի հուսալի գործընկերն ու հավատարիմ դաշնակիցն է տարածաշրջանում և դրանից դուրս։
Իրակլի Ղարիբաշվիլին և Ֆիլիպ Ռիկերը խոսել են Ուկրաինայում շարունակվող պատերազմի և տարածաշրջանում և աշխարհում ստեղծված անվտանգության ծանր իրավիճակի մասին։ Զրույցի ընթացքում անդրադարձ է եղել նաև Վրաստանի օկուպացված տարածքներում ստեղծված ծանր իրավիճակին։ Իրակլի Ղարիբաշվիլին նշել է, որ չափազանց կարևոր է հակամարտությունները լուծել խաղաղ ճանապարհով։ Այս համատեքստում ընդգծվել է Ժնևում միջազգային քննարկումների կարևորությունը։
Ֆիլիպ Ռիկերը ևս մեկ անգամ հաստատել է վարչապետին ԱՄՆ-ի հաստատակամ աջակցությունը երկրի տարածքային ամբողջականությանն ու ինքնիշխանությանը։
Զրույցում անդրադարձ է եղել նաև վարչապետ Իրակլի Ղարիբաշվիլիի միջնորդությամբ և Ֆիլիպ Ռիկերի ներգրավմամբ Հայաստանի և Ադրբեջանի միջև ձեռք բերված պայմանավորվածությանը, որի արդյունքում Ադրբեջանն ազատ է արձակել հայ գերիներին, իսկ Հայաստանը կարևոր քարտեզներ է հանձնել Ադրբեջանին։
Քննարկված հարցերի թվում էր նաև Վրաստանի եվրաինտեգրման հարցը։ Իրակլի Ղարիբաշվիլիի խոսքով, Եվրոպական խորհուրդը, Վրաստանին տալով եվրոպական հեռանկար, հաստատեց, որ Վրաստանի ապագան Եվրամիությունում է, և որ Վրաստանը հաստատակամորեն գնում է եվրոպական ճանապարհով։
Կառավարության վարչակազմում կայացած հանդիպմանը մասնակցել են Վրաստանում ԱՄՆ-ի դեսպան Քելի Դեգնանը և արտաքին գործերի նախարար Իլիա Դարչիաշվիլին։