Վրաստանի վարչապետ Իրակլի Ղարիբաշվիլին հանդիպել է Համաշխարհային բանկի Հարավային Կովկասում նոր տարածաշրջանային տնօրեն Ռոլանդ Փրայզի հետ, ով պաշտոնապես կսկսի իր աշխատանքը սեպտեմբերի 1-ին։ Հանդիպմանը ներկա էր նաև Համաշխարհային բանկի տարածաշրջանային տնօրենի պաշտոնակատար Սեբաստիան Մոլինեուսը, ով հունիսի վերջին կավարտի իր քառամյա աշխատանքը այս պաշտոնում։

Իրակլի Ղարիբաշվիլին շնորհավորել է Ռոլանդ Փրայզին նոր պաշտոնի կապակցությամբ և շնորհակալություն է հայտնել Սեբաստիան Մոլինեուսին՝ Վրաստանի կառավարության հետ արդյունավետ համագործակցության համար։ Վարչապետը հաջողություն է մաղթել Ռոլանդ Փրայզին և Սեբաստիան Մոլինեուսին հետագա աշխատանքում։

Հանդիպմանը քննարկվել է Վրաստանի կառավարության և Համաշխարհային բանկի միջև համագործակցության դինամիկան։ Վարչապետն ընդգծել է Համաշխարհային բանկի կողմից անկախության ձեռքբերումից հետո Վրաստանի զարգացման գործում ունեցած նշանակալի ներդրումը։ Նշվել է, որ երեք տասնամյակ Համաշխարհային բանկը կարևոր դեր է խաղացել Վրաստանի տնտեսության զարգացման, աճի և արդիականացման գործում։

Համաշխարհային բանկի ներկայիս պորտֆելը բաղկացած է 15 ակտիվ ներդրումներից և կազմում է 1,5 միլիարդ դոլար:

Տեղեկությունը տարածում է Վրաստանի վարչապետի մամուլի գրասենյակը։