Իրակլի Ղարիբաշվիլին հանդիպել է Գերմանիայի նախագահ Ֆրանկ-Վալտեր Շտայնմայերի հետ
Վրաստանի վարչապետ Իրակլի Ղարիբաշվիլին Բեռլին կատարած պաշտոնական այցի շրջանակներում հանդիպել է Գերմանիայի Դաշնային Հանրապետության նախագահ Ֆրանկ-Վալտեր Շտայնմայերի հետ։
Հանդիպմանը ընդգծվել է նշված այցի առանձնահատուկ նշանակությունը երկրների միջև առկա գործընկերային կապերի հետագա ամրապնդման համար։ Վարչապետը հատկապես նշել է Գերմանիայի և անձամբ նախագահ Շտայնմայերի ակնառու քաղաքական աջակցությունը Վրաստանին։
Նշվել է, որ Վրաստանը և Գերմանիան միմյանց համար հուսալի և արժեքավոր գործընկերներ են՝ հիմնված երկարամյա կապերի և ընդհանուր արժեքների վրա։ Հատկապես ընդգծվել է Գերմանիայի կարևոր դերը Վրաստանի եվրաատլանտյան ինտեգրման գործընթացի հաջողության գործում։
Նշվել է Գերմանիայի գործնական աջակցությունը, որը երկար տարիներ իրականացվել է Վրաստանում ինչպես Գերմանիայի կառավարության, այնպես էլ տարբեր կառույցների ու մասնավոր հատվածի կողմից։ Կողմերը ողջունել են երկրների միջև տարիներ շարունակ հաջողված առևտրատնտեսական համագործակցությունը, ինչը Վրաստանում գերմանական ընկերությունների գործունեության վառ ապացույցն է։
Կողմերը խոսել են համատեղ քայլերի և ուղիների մասին, որոնք կօգնեն գերմանական բիզնեսին ավելի հետաքրքրել Վրաստանի տնտեսական և ներդրումային ներուժով։ Վարչապետն ընդգծել է Միջազգային զարգացման բանկի (KfW), Միջազգային համագործակցության կազմակերպության (GIZ) և գերմանական այլ գործակալությունների կողմից ցուցաբերվող աջակցության կարևորությունը երկրի զարգացման տեսանկյունից։
Կողմերը քննարկել են նաև տարածաշրջանում անվտանգության իրավիճակը և Վրաստանի օկուպացված տարածքներում տիրող իրավիճակը։
Իրակլի Ղարիբաշվիլին շնորհակալություն է հայտնել Գերմանիային Վրաստանի ինքնիշխանությանն ու տարածքային ամբողջականությանը աջակցելու և հակամարտության խաղաղ կարգավորումն ապահովելու Գերմանիայի կառավարության ջանքերի համար։ Զրույցի ընթացքում անդրադարձ է կատարվել Վրաստանի խաղաղության քաղաքականությանը և այդ հարցում միջազգային հանրության աջակցության կարևորությանը։
Կողմերը ողջունել են Եվրոպական խորհրդի պատմական որոշումը՝ Վրաստանին Եվրամիությանն անդամակցելու հեռանկար տրամադրելու վերաբերյալ։ Զրույցի ընթացքում անդրադարձ է եղել նաև Վրաստանի կողմից ներկայացված գործողությունների ծրագրին և առաջարկությունների իրականացմանն ուղղված քայլերին։
Հանդիպմանը պլաններ են մշակվել երկու երկրների միջև համագործակցությունն ավելի բարձր մակարդակի բարձրացնելու ուղղությամբ, և լիակատար պատրաստակամություն է արտահայտվել տարբեր ուղղություններով բազմակողմ համագործակցությունը խորացնելու համար։
Վրաստանի վարչապետը գրառում է կատարել պատվավոր հյուրերի գրքում.
Տեղեկությունը տարածում է Վրաստանի կառավարության վարչակազմի մամուլի ծառայությունը։
