Իրակլի Ղարիբաշվիլին հանդիպել է «EBRD»-ի Կովկասի տարածաշրջանային տնօրենի հետ
Վրաստանի վարչապետ Իրակլի Ղարիբաշվիլին հանդիպել է Վերակառուցման և զարգացման եվրոպական բանկի (EBRD) Կովկասի տարածաշրջանային տնօրեն Կատարինա Բյորլին Հանսենի հետ:
Վարչապետի մամուլի ծառայության փոխանցմամբ, Իրակլի Ղարիբաշվիլին դրական է գնահատել Վերակառուցման և զարգացման եվրոպական բանկի հետ հաջող համագործակցությունը և հույս հայտնել, որ EBRD-ն կշարունակի աջակցել Վրաստանի զարգացման օրակարգին՝ երկրի առաջնահերթ նախագծերը ֆինանսավորելով:
Կառավարության ղեկավարի խոսքերով, Վերակառուցման եւ զարգացման եվրոպական բանկը Վրաստանի հավատարիմ գործընկերն է, որից 1992 թվականից ի վեր ստացված ֆինանսական օգնությունը կազմել է շուրջ չորս միլիարդ եվրո: EBRD-ի պորտֆելի ամենամեծ մասնաբաժինը գալիս է մասնավոր հատվածին, որն ուժեղ և կայուն ազդեցություն ունի երկրի տնտեսության վրա:
Վարչապետը նշել է, որ Վրաստանը եվրոպական ուժեղ նկրտումների երկիր է, որը հետևում է տնտեսական վերափոխման եվրոպական ուղուն, և EBRD-ի դերն այս ճանապարհին խիստ կարևոր է:
Վարչապետի մամուլի ծառայության հաղորդմամբ, Իրակլի Ղարիբաշվիլին և Կատարինա Բյորլին Հանսենը քննարկել են ընթացիկ նախագծերը և նախանշել ապագա համագործակցության հեռանկարները: Նշվել է, որ Վերակառուցման և զարգացման եվրոպական բանկը (EBRD) պետք է կարևոր դեր խաղա հետհամաճարակային շրջանում:
Վրաստանում Վերակառուցման և զարգացման եվրոպական բանկի ֆինանսավորմամբ ծրագրեր են իրականացվում էներգետիկայի, քաղաքային ենթակառուցվածքների, բանկային և գյուղատնտեսության ոլորտներում:
«Մենք շատ բեղմնավոր հանդիպում ունեցանք Վրաստանի վարչապետի հետ: Մենք վերանայեցինք Վերակառուցման և զարգացման եվրոպական բանկի կողմից ճգնաժամային աջակցության համատեքստում անցյալ տարի իրականացված գործողությունները: Մենք խոսեցինք նաև Վրաստանի և Եվրոպական բանկի ապագա ծրագրերի, երկրի ողջ տարածքում առկա մարտահրավերները լուծելու համատեղ ջանքերի մասին: Զրույցը կենտրոնացավ նաև ներդրողների խորհրդի շատ կարևոր ձեռքբերումների վրա, որը պետական և մասնավոր հատվածների միջև երկխոսության ակտիվ հարթակ է», – ասաց Կատարինա Բյորլին Հանսենը:
Կառավարության վարչությունում տեղի ունեցած հանդիպմանը մասնակցել են Վրաստանի Ներդրողների խորհրդի քարտուղարության ղեկավար Գիորգի Չերքեզիշվիլին և կառավարության վարչության ղեկավար Իլիա Դարչիաշվիլին:
