Վրաստանի վարչապետ Իրակլի Ղարիբաշվիլին հանդիպել է Արաբական Միացյալ Էմիրությունների էկոնոմիկայի և առևտրի հարցերով պետնախարար Ահմեդ Ալի Ալ Սայիգիի հետ։

Հանդիպմանն անդրադարձ է եղել տարբեր ոլորտներում երկու երկրների միջև առկա համագործակցությանը։ Նշվել է, որ երկու երկրների միջև քաղաքական երկխոսությունը գտնվում է բարձր մակարդակի վրա, ինչի մասին են վկայում վերջին տարիներին Վրաստան և Արաբական Միացյալ Էմիրություններ բարձր մակարդակի այցերը։

Քննարկված հարցերի թվում էր Վրաստանում բարենպաստ գործարար միջավայրը։ Նշվեց, որ Վրաստանում արաբական ներդրումներով ֆինանսավորվող բազմաթիվ նախագծեր կան, և ողջունելի է, որ դրանց թիվը գնալով ավելանում է։ Ասվել է, որ Վրաստանի և Արաբական Միացյալ Էմիրությունների միջև ազատ առևտրի ռեժիմ հաստատելու շուրջ երկխոսությունը կսկսվի այս ամիս։ Վարչապետի խոսքով, ազատ առևտրի գոտու ստեղծումը բարենպաստ մթնոլորտ կստեղծի երկու երկրների միջև տնտեսական և առևտրային հարաբերությունների խթանման և զարգացման համար։

Կառավարության ղեկավարը շնորհակալություն է հայտնել Արաբական Միացյալ Էմիրությունների կառավարությանը՝ Վրաստանի քաղաքացիներին առանց վիզայի ռեժիմ տրամադրելու համար։

Կառավարության վարչակազմում կայացած հանդիպմանը ներկա էին Առևտրի և արդյունաբերության դաշնային պալատի նախագահ Աբդուլլահ Ալ Մազրուին, Աբու Դաբիի զարգացման հիմնադրամի գործառնությունների տնօրեն Ադել Ալ Հոսանին, Dhabi Group-ի գործադիր տնօրեն Սամի Էդվարդ Ադամսը, Etihad Credit Insurance Company, Dubai Industry-ի գործադիր տնօրեն Մեյսոն Ֆալկոնին և Export Corporation-ի գլխավոր տնօրեն Սաիդ Ալ Ավադին, իսկ վրացական կողմից՝ Վրաստանի փոխվարչապետ, էկոնոմիկայի և կայուն զարգացման նախարար Լևան Դավիթաշվիլին, արտաքին գործերի փոխնախարար Ալեքսանդր Խվթիսիաշվիլին, ինչպես նաև Արաբական Միացյալ Էմիրություններում Վրաստանի արտակարգ և լիազոր դեսպան Պաատա Կալանդաձեն։

Տեղեկությունը տարածում է Վրաստանի վարչապետի մամուլի ծառայությունը։