Վրաստանի վարչապետ Իրակլի Ղարիբաշվիլին հանդիպել է Ամերիկայի Միացյալ Նահանգների նախագահի ազգային անվտանգության հարցերով խորհրդական Ջեյք Սալիվանի հետ։

Վրաստանի կառավարության տեղեկատվության համաձայն՝ կողմերը քննարկել են երկկողմ հարաբերությունների հարցերի լայն շրջանակ և քննարկել ռազմավարական գործընկերության ամրապնդման ուղղությամբ ձեռնարկվելիք քայլերը։

«Զրույցը շոշափել է տարածաշրջանային անվտանգության խնդիրներ։ Իրակլի Ղարիբաշվիլին ընդգծել է գլոբալ մարտահրավերներին դիմակայելու համախմբված ջանքերի կարևորությունը։ Իրակլի Ղարիբաշվիլին և Ջեյք Սալիվանը քննարկել են Վրաստանի եվրաինտեգրման գործընթացը։ Իրակլի Ղարիբաշվիլին ընդգծել է, որ երկրի եվրաինտեգրումը Վրաստանի կառավարության արտաքին քաղաքականության կարևորագույն առաջնահերթությունն է, և կառավարչական թիմն ամեն ինչ անում է դրված նպատակին հասնելու համար։

Հանդիպմանը Իրակլի Ղարիբաշվիլին ընդգծել է Վրաստան Ամերիկայի Միացյալ Նահանգների նոր դեսպանի ժամանակին ժամանման կարևորությունը։ Վարչապետը նշել է, որ ողջունում է Ռոբին Դանիգանի նշանակումը նոր դեսպան, ում հետ Վրաստանի կառավարությունը նախատեսում է ակտիվ և սերտ համագործակցել երկկողմ հարաբերությունները խորացնելու և ամրապնդելու նպատակով»,- ասված է կառավարության տեղեկատվության մեջ։