Վրաստանի վարչապետ Իրակլի Ղարիբաշվիլին հանդիպել է Alshaya Group-ի գործադիր նախագահ Մոհամմադ Ալշայայի հետ։

Վարչապետի մամուլի ծառայությունից հայտնում են, որ Մոհամմադ Ալշայան վարչապետին է ներկայացրել ընկերության առաջնահերթություններն ու գործունեության հիմնական ուղղությունները։

Կառավարության ղեկավարն իր հերթին նրան տեղեկացրել է Վրաստանում բարենպաստ գործարար միջավայրի և կայուն տնտեսական իրավիճակի մասին։ Կողմերը պատրաստակամություն են հայտնել հետագա համագործակցության համար և քննարկել այս ուղղությամբ կոնկրետ ուղղություններ։ Alshaya Group-ը Քուվեյթի խոշորագույն ընկերությունն է, որը ֆրանչայզային օպերատոր է ավելի քան 70 մանրածախ ապրանքանիշերի համար, ներառյալ Starbucks, Mothercare, H&M, Debenhams, American Eagle Outfitters, Payless և այլն:

Ընկերության պորտֆելը ներառում է մի շարք ոլորտներ՝ առողջություն, գեղեցկություն, կահույք, նորաձևություն, սնունդ, ժամանց: Նրան են պատկանում հազարավոր խանութներ, սրճարաններ, ռեստորաններ, առցանց և թվային բիզնեսներ ամբողջ աշխարհում: Alshaya Group-ը, բացի մանրածախ առևտրից, տիրապետում է անշարժ գույքի, շինարարության, հյուրանոցների և ավտոմեքենաների ոլորտներին: Ընկերությունում աշխատում է ավելի քան 46000 մարդ, իսկ եկամուտը կազմում է 12,7 միլիարդ դոլար: Այն գործում է Եվրոպայի, Ասիայի և Մերձավոր Արևելքի շատ երկրներում։

Տեղեկությունը տարածում է Վրաստանի վարչապետի մամուլի ծառայությունը։