Իրակլի Ղարիբաշվիլին Գրանադայում հանդիպել է Ուրսուլա ֆոն դեր Լեյենին
Վրաստանի վարչապետ Իրակլի Ղարիբաշվիլին Իսպանիայի Թագավորություն կատարած այցի շրջանակներում հանդիպել է Եվրահանձնաժողովի նախագահ Ուրսուլա ֆոն դեր Լեյենի հետ։
Խոսելով Ուրսուլա ֆոն դեր Լեյենի հետ՝ Իրակլի Ղարիբաշվիլին ընդգծել է եվրաինտեգրման ճանապարհին Վրաստանի հաջողությունների և տարեվերջյան երկրին կարգավիճակ տալու կարևորությունը ինչպես տարածաշրջանային, այնպես էլ գլոբալ համատեքստում։
Վարչապետը Եվրահանձնաժողովի նախագահին մանրամասն տեղեկատվություն է ներկայացրել 12 հանձնարարականների կատարման ուղղությամբ ձեռք բերված առաջընթացի մասին։ Նրա խոսքով, Վրաստանի կառավարությունն արել է հնարավորը՝ հանձնարարականները կյանքի կոչելու համար, և գործընթացը դեռ շարունակվում է։
Ինչպես նշել է վարչապետը, Վրաստանը սերտորեն համագործակցել է Եվրամիության և Վենետիկի հանձնաժողովի հետ հանձնարարականների կատարման գործընթացում և շարունակում է դա անել։
Իրակլի Ղարիբաշվիլին հույս է հայտնել, որ Վրաստանի առաջընթացը և 12 առաջնահերթությունները կյանքի կոչելու ջանքերը արդարացիորեն կճանաչվեն։ Ըստ այդմ, Վրաստանը սպասում է հանձնաժողովի կողմից տարեվերջին ճիշտ քաղաքական որոշմանը։
Վարչապետն ընդգծել է նաև Վրաստանի կարևոր դերը տարածաշրջանային անվտանգության ապահովման գործընթացում և նշել, որ Վրաստանը միշտ պատրաստ է նպաստել տարածաշրջանում խաղաղության և կայունության ապահովմանը։
Տեղեկությունը տարածում է Վրաստանի վարչապետի մամուլի գրասենյակը։