Վրաստանի վարչապետ Իրակլի Ղարիբաշվիլին հանդիպել է շվեյցարական «Stadler» (Stadler Rail AG) ընկերության սեփականատիրոջ և տնօրենների խորհրդի նախագահ Պիտեր Սփուլերի հետ։

Վարչապետի մամուլի ծառայությունից հայտնում են, որ հանդիպմանը քննարկվել է Վրաստանի կառավարության և «Շտադլերի» համագործակցությունը։ Քննարկվել են Վրաստանում խոշոր ընկերության ծրագրած նախագծերը։

Նրանց խոսքով՝ զրույցի ընթացքում քննարկվել է Վրաստանում
«Stadler»-ի գործարան կառուցելու հնարավորությունը, որը կապահովի երկաթուղու բաղադրամասերի արտադրությունն ու վերանորոգումը։ Նշվել է, որ կառավարությունն անելու է առավելագույնը այս ներդրմանը աջակցելու համար։

Հանդիպմանը քննարկվել են Վրաստանում բարենպաստ գործարար միջավայրը և երկրում իրականացվող և նախատեսվող բարեփոխումները, ինչպես նաև ազատ առևտրի համաձայնագրերը, այդ թվում՝ Եվրամիության, Չինաստանի և տարածաշրջանի երկրների հետ, որոնք Վրաստանին թույլ են տալիս ազատ մուտք գործել բազմաթիվ հիմնական շուկաներ։

Միևնույն ժամանակ նշվել է Վրաստանի՝ որպես տարածաշրջանային տարանցիկ հանգույցի դերը և զարգացման հեռանկարներն այս ուղղությամբ։

Հանդիպմանը մասնակցել են Stadler’s Marketing-ի և վաճառքի տնօրեն Մաթիաս Ստոհին, Վրաստանում Շվեյցարիայի դեսպան Հայդի Գրաուն, Վրացական երկաթուղու գլխավոր տնօրեն Դավիթ Փերաձեն, Վրաստանի երկաթուղու վերահսկիչ խորհրդի նախագահ Կոկա Գունցաձեն: