Վրաստանի վարչապետ Իրակլի Ղարիբաշվիլիի խոսքով՝ Վրաստանն ակտիվորեն շարունակում է իր ինտեգրումը Եվրամիությանը։ Բաքվում SPECA-ի տնտեսական համաժողովում վարչապետը խոսել է այս ուղղությամբ ձեռնարկվող քայլերի մասին։

Բացի այդ, ինչպես նշել է Իրակլի Ղարիբաշվիլին, Վրաստանը, որպես տնտեսական տեսակետից աճող ներուժ ունեցող երկիր, հուսալի և կայուն գործընկեր է։

«Մենք ակտիվորեն շարունակում ենք մեր ինտեգրումը Եվրամիությանը։ Վերջին տասը տարում մենք ստորագրել ենք ասոցացման համաձայնագիրը, ազատ առևտուրը Եվրոպայի հետ։ Գործարկվեց ազատ տեղաշարժի ռեժիմը, Եվրամիության հետ առանց վիզայի ազատ տեղաշարժի ռեժիմը։ Մենք անցյալ տարի ստացել ենք եվրոպական հեռանկարը, իսկ դեկտեմբերին ակնկալում ենք թեկնածուի կարգավիճակ։ Նաև ուզում եմ նշել, որ Վրաստանը, որպես աճող տնտեսական ներուժ ունեցող երկիր, հուսալի և կայուն գործընկեր է։ Մինչ օրս մենք ստորագրել ենք ազատ առևտրի համաձայնագրեր Եվրամիության, Չինաստանի հետ, ազատ առևտուր ունենք ԱՊՀ երկրների, Մեծ Բրիտանիայի, Արաբական Միացյալ Էմիրությունների, Թուրքիայի հետ, իսկ ընդհանուր առմամբ Վրաստանում ազատ առևտրի համաձայնագրերը ներդրողներին հնարավորություն են տալիս մուտք գործել 2,3 միլիարդ սպառողով շուկա»,- ասել է Իրակլի Ղարիբաշվիլին։

Իրակլի Ղարիբաշվիլիի խոսքով՝ Վրաստանի և Չինաստանի հարաբերություններն այս տարի նոր մակարդակի են հասել։

«Այս տարվա հուլիսին ես շատ հաջող այց ունեցա Չինաստան, և մենք մեր հարաբերությունները նոր մակարդակի բարձրացրինք։ Մենք ստորագրել ենք ռազմավարական գործընկերության համաձայնագիր, որը նոր հնարավորություններ է ընձեռում ոչ միայն մեր երկրներին, այլև ողջ տարածաշրջանին։ Ուզում եմ նաև նշել, որ մենք տարածաշրջանում միակ երկիրն ենք, որն ազատ առևտրի համաձայնագիր ունի Չինաստանի և Եվրամիության հետ։ Վրաստանը շահագրգռված է Ադրբեջանի՝ Կենտրոնական Ասիայի տարածաշրջանի հետ մեր գործընկերության և համագործակցության ամրապնդմամբ, ինչը մեր երկրներին ավելի մեծ բարգավաճում և կայունություն կբերի։ Ուզում եմ ևս մեկ անգամ շնորհակալություն հայտնել նախագահ Ալիևին այսօրվա կարևոր միջոցառումը հյուրընկալելու համար և հաջողություն մաղթել նրան իր հետագա գործունեության մեջ»,- ասել է Իրակլի Ղարիբաշվիլին։