Վրաստանի վարչապետ Իրակլի Ղարիբաշվիլին իր հունգարացի գործընկեր Վիկտոր Օրբանի հետ համատեղ ճեպազրույցում հայտարարել է, որ Վրաստանին և Հունգարիային միավորում է ավանդական և հավերժական արժեքներին իրենց հավատարմությունը, որոնք վճռորոշ դեր են խաղացել մեր պատմության, մշակույթի և ինքնության պահպանման գործում։

Ղարիբաշվիլիի խոսքով, հունգարացի ժողովրդի բախտը բերել է, որ նման դժվարին պահին Հունգարիան ունի այդքան ուժեղ և հայրենասեր առաջնորդ, ով միայն պաշտպանում է իր երկրի շահերը։

«Կցանկանայի հատկապես նշել, որ մեզ ուրախացնում է այն փաստը, որ մեր երկրներին միավորում է ավանդական և հավերժական արժեքներին նվիրվածությունը, ինչը, կարելի է ասել, որոշիչ դեր է խաղացել մեր պատմության, մշակույթի, մեր ինքնության պահպանման գործում։ Սա ներառում է հավատարմությունը մեր երկրներին, հայրենիքին և մեր համոզմունքներին, կրոնին, ընտանիքի սրբությանը, հարգանքը մեր ավանդույթների նկատմամբ, և ես չեմ կարող չնշել պարոն Վիկտոր Օրբանի վաստակը այս իսկական արժեքների, ավանդույթների պաշտպանության և ամրապնդման գործում:

Ես ասացի Հունգարիայում և ուզում եմ կրկնել, հունգարիայի ժողովրդի բախտն իսկապես բերել է, որ նման դժվարին պահին, նման անկանխատեսելի ժամանակներում Հունգարիան ունի այդքան ուժեղ և հայրենասեր առաջնորդ, ով միայն պաշտպանում է իր երկրի շահերը և ծառայում է իր ժողովրդին»,- ասել է Իրակլի Ղարիբաշվիլին։