Իրակլի Ղարիբաշվիլի. Վրացական բանակը ամուր հենարան է, երկրի անկախության և տարածքային ամբողջականության պաշտպանության գլխավոր երաշխավորը, վրացական բանակն արժանի է ամենալավին
Վրացական բանակը ամուր հենարան է, մեր երկրի անկախության, ինքնիշխանության և տարածքային ամբողջականության պաշտպանության հիմնական երաշխավորը։ Վրացական բանակն արժանի է ամենալավին, մեր պարտքն է հնարավորինս գնահատել ձեր վաստակն ու պատվաբեր ծառայությունը,- ասել է Վրաստանի վարչապետ Իրակլի Ղարիբաշվիլին Վրաստանի պաշտպանության ուժերի 32-րդ տարեդարձի կապակցությամբ կազմակերպված հանդիսավոր միջոցառման ժամանակ, Վազիանիի 4-րդ հետևակային բրիգադի ուսումնական հրապարակում։
Ղարիբաշվիլիի խոսքով՝ ինքը շնորհակալություն է հայտնում զինվորականներին հայրենիքին նվիրվածության և հավատարիմ ծառայության համար։
«Շնորհավորում եմ Վրաստանի պաշտպանության ուժերի օրվա առթիվ։ Այսօր ուզում եմ շնորհավորել բոլորիդ՝ մեր վաստակաշատ ու հպարտ զինվորականներին, ովքեր արժանապատվորեն ծառայում են մեր երկրին։ Այս օրվա առթիվ ուզում եմ շնորհավորել մեր անպարտելի, նվիրյալ ու հերոս վիրավոր մարտիկներին, ովքեր պաշտպանության ուժերի բոլոր վետերանների հետ միասին խիզախորեն մարտնչեցին և շարունակում են պայքարել հանուն մեր երկրի ազատության։ Ուզում եմ շնորհակալություն հայտնել բոլորիդ պատվաբեր ծառայության համար։ Ուզում եմ ևս մեկ անգամ նշել, որ վրացական բանակը մեր երկրի անկախության, ինքնիշխանության և տարածքային ամբողջականության պաշտպանության հիմնական երաշխավորն է։ Այսօր ուզում եմ խոնարհվել բոլոր զոհված հերոսամարտիկների, մեր հերոս մարտիկների հիշատակի առաջ, որոնց պայքարի ու նվիրումի վրա է դրված մեր երկրի ազատությունն ու ապագան։ Նրանց պայքարը ամրապնդեց վրացական ինքնությունը, մեր ազգային, պետական արժեքները, հիմք ստեղծեց մեր հիմնական նպատակի իրականացման համար, որը նշանակում է միասնական, ուժեղ Վրաստան։ Սիրելի՛ զինվորներ, ուզում եմ անկեղծորեն շնորհակալություն հայտնել բոլորիդ՝ մեր հայրենիքին նվիրումի և հավատարիմ ծառայության համար։ Վրացական բանակն արժանի է ամենալավին, մեր պարտքն է հնարավորինս գնահատել ձեր վաստակն ու ձեր պատվաբեր ծառայությունը։ Վրաստանի կառավարությունն ամեն ինչ անում է վրացական բանակն էլ ավելի հզորացնելու համար, ձեզանից յուրաքանչյուրի ծառայությունը բարձր կգնահատվի»,- ասել է Իրակլի Ղարիբաշվիլին։
Բացի այդ, վարչապետը նշել է, որ այսօր շատ դժվար ժամանակաշրջան է ողջ աշխարհում։
«Ռուսաստանի ագրեսիան Ուկրաինայում, պատերազմ, որը չի դադարում. Առանց այն էլ դժվար կանխատեսելի, բուռն աշխարհաքաղաքական միջավայրում մենք՝ կառավարությունը, մեր իշխանությունները հատուկ իմաստության պարտական ենք։ Միաժամանակ մենք շատ լավ հասկանում ենք, որ պետք է էլ ավելի ամրապնդենք մեր պետության ինստիտուտները և առաջին հերթին վրացական բանակը՝ որպես մեր երկրի անվտանգության և խաղաղության համար կարևորագույն ուժ։ Մենք շարունակում ենք երկարաժամկետ պլանի համաձայն զարգացնել մեր պաշտպանունակությունը, շարունակում ենք պաշտպանական ուժերի վերափոխման գործընթացը, և ես հավատում եմ, որ մեր բանակն էլ ավելի կհզորանա։ Այսօր ուզում եմ ևս մեկ անգամ շնորհակալություն հայտնել մեր միջազգային գործընկերներին՝ ԱՄՆ-ին, ՆԱՏՕ-ի անդամ երկրներին, բոլոր նրանց, ովքեր օգնեցին և օգնում են հզորացնել մեր վրացական բանակը։ Եվս մեկ անգամ շնորհավորում եմ Պաշտպանության ուժերի օրվա առթիվ, մաղթում եմ ձեզ հաղթանակ, թող Աստված ձեզ պահապան լինի»,- ասել է Իրակլի Ղարիբաշվիլին։
