Իրակլի Ղարիբաշվիլի. Մինչև 2012 թվականը մենք ապրում էինք բռնապետական ռեժիմի պայմաններում, ժողովրդավարության իրական նշաններ չկային, 2012 թվականից հետո երկիրը զգալի առաջընթաց գրանցեց եվրոպական ճանապարհին
Մինչև 2012 թվականը մենք ապրում էինք բռնատիրական, ավտոկրատական ռեժիմի պայմաններում, որտեղ ժողովրդավարության իրական նշաններ չկար՝ ո՛չ լրատվամիջոցները, ո՛չ ազատ դատարանը, – հայտարարել է Վրաստանի վարչապետ Իրակլի Ղարիբաշվիլին՝ Եվրահանձնակատար Օլիվեր Վարհեյի հետ համատեղ ասուլիսում։
Ղարիբաշվիլիի խոսքով՝ 2012 թվականից հետո երկիրը մեծ առաջընթաց է գրանցել եվրոպական ճանապարհին։
«Օլիվեր Վարհեյը մեր ժողովրդի ու երկրի բարեկամն է, մեր երկրի եվրոպական ընտրության ակտիվ ջատագովը։ Կառավարության անունից ուզում եմ շնորհակալություն հայտնել նրան մեր երկրի եվրոպականացման գործում ունեցած անձնական ներդրման համար։ Պարոն Վարհեյի այցն առաջինն է այն բանից հետո, երբ Եվրոպական խորհուրդը հունիսին կայացրեց պատմական որոշում, երբ Վրաստանը ստացավ եվրոպական հեռանկար։ Դուք գիտեք, որ Վրաստանը հավատարիմ է եվրոպական ընտրությանը։ Սա մեր պատմական ընտրությունն է, սերնդային ընտրությունն ու երազանքը՝ դառնալ եվրոպական ընտանիքի արժանի ու լիարժեք անդամ։ Այս ճանապարհին մենք անում ենք հնարավորը։ Մեր կառավարության պատիվն է, որ 2012 թվականից հետո եվրոպական ճանապարհի բոլոր շոշափելի արդյունքները մեր իշխող կուսակցության վաստակն են՝ լինի դա ասոցացման համաձայնագիրը, ազատ առևտրի համաձայնագիրը, առանց վիզայի ռեժիմը և այժմ եվրոպական հեռանկարը։ Շատ կարճ ժամանակում մենք հասել ենք շոշափելի արդյունքների, ինչը Վրաստանն առանձնացնում է որպես Արևելյան Եվրոպայի գործընկերության խմբի առաջատար երկրներից մեկը»,- ասել է վարչապետը։
Վրաստանի վարչապետը նաեւ հայտարարել է, որ Վրաստանի խնդիրն է խաղաղ ճանապարհով երկիրը ապաօկուպացնել։
