Մենք ողջունում ենք Ղազախստանի էներգետիկ ռեսուրսների փոխադրման ավելացման հեռանկարները՝ օգտագործելով Վրաստանի տրանսպորտային ենթակառուցվածքները և Սև ծովի նավահանգիստները,- հայտարարել է Վրաստանի վարչապետ Իրակլի Ղարիբաշվիլին Ղազախստանի վարչապետ Ալիխան Սմայիլովի հետ համատեղ մամուլի ասուլիսում։

Ինչպես նշել է Ղարիբաշվիլին, այս ամենը պետք է գրավիչ լինի ղազախական կողմի համար։

«Այս ուղղությամբ մենք էլ ավելի ակտիվ կհամագործակցենք մեր ընկերների հետ։ Առևտրի ծավալը վերջին մեկ տարում զգալիորեն աճել է՝ գրանցելով 136 տոկոս աճ, ինչը հուսադրող է։ Այս միտումը պահպանվում է նաև այս տարի։ Առևտրաշրջանառությունն այս տարվա հունվար-ապրիլին կազմել է 188 մլն դոլար, ինչը 283 տոկոսով ավելի է նախորդ տարվա նույն ժամանակահատվածի համեմատ։

Մենք նաև կարևորում ենք մեր երկրների միջև առկա համագործակցությունը և համագործակցության ամրապնդումը մշակույթի, կրթության, գիտության, սպորտի ոլորտներում։ Մենք նաև մեր պատրաստակամությունն ենք հայտնել շարունակել հետագա համագործակցությունը ղազախական կողմի հետ բարեփոխումների ոլորտում՝ փոխադարձ փորձի փոխանակման առումով։ Այսպիսով, կարծում ենք, որ մեծ ներուժ ունենք: Երկու կողմերն էլ պատրաստ են լիովին օգտագործել այդ ներուժը։

Ուզում եմ կրկին շնորհակալություն հայտնել իմ սիրելի ընկերոջը այցելության համար։ Մեծ գոհունակությամբ եմ հիշում անցյալ տարի Ղազախստան կատարած իմ այցը։ Ես շնորհակալություն հայտնեցի վարչապետին ջերմ հյուրընկալության համար, և մենք՝ վրացիներս, նույնպես փորձեցինք պատշաճ հյուրընկալություն ցուցաբերել»,- ասել է Իրակլի Ղարիբաշվիլին։