Մեր կողմից մենք ջանք չենք խնայի, որ բոլոր հանձնարարականները հնարավորինս արագ և հստակորեն կատարվեն,- հայտարարել է Վրաստանի վարչապետ Իրակլի Ղարիբաշվիլին՝ Եվրոպական հարևանության քաղաքականության և ընդլայնման հարցերով եվրահանձնակատար Օլիվեր Վարհեյի հետ համատեղ մամուլի ասուլիսում։

Նրա խոսքով, հուսանք, որ ընդդիմությունը պատասխանատու մոտեցմամբ ներգրավված կլինի այս գործընթացում։

«Եվս մեկ անգամ ուզում եմ հստակեցնել, որ մենք մեր կողմից ջանք չենք խնայի, որպեսզի հնարավորինս սեղմ ժամկետներում այս բոլոր հանձնարարականները հստակորեն և հիմնովին իրականացվեն։ Հենց այդ նպատակով է կազմվում խորհրդարանի կողմից մշակված և հանրությանը, այդ թվում՝ մեր եվրոպացի գործընկերներին ներկայացվող ժամանակացույցը։ Այդ նպատակով յուրաքանչյուր հանձնարարականի համար ստեղծվել է աշխատանքային խումբ և ակտիվ աշխատանքներ են տարվում։ Մենք մեր ջանքերը չենք նվազեցնի և ամեն ինչ կանենք հնարավորինս սեղմ ժամկետներում։ Մնացածը ընդդիմության գործն է։ Ուզում եմ պատասխանել նույն լավատեսությամբ, ինչ արտահայտեց եվրահանձնակատարը։ Մենք հուսով ենք, որ ընդդիմությունը պատասխանատու մոտեցմամբ կներգրավվի այս գործընթացում»,- ասել է Ղարիբաշվիլին։