«Իլհամ Ալիևի հետ հանդիպմանը մենք խոսեցինք առևտրատնտեսական խնդիրների մասին, քննարկեցինք էներգետիկ, տրանսպորտ, լոգիստիկ հարցեր, Ադրբեջանը Վրաստանի խոշոր առևտրային գործընկերներից մեկն է, ամեն տարի այն առաջին հնգյակում է։ Այս տարի առևտուրն աճել է 15 տոկոսով, անցած տարի ևս ռեկորդային տարի ենք ունեցել»,- ասել է Վրաստանի վարչապետ Իրակլի Ղարիբաշվիլին Ադրբեջանի նախագահ Իլհամ Ալիևի հետ համատեղ ճեպազրույցում։

Ղարիբաշվիլիի խոսքով՝ Վրաստանը շարունակում է Ադրբեջանի հետ երկարաժամկետ ռազմավարական գործընկերությունը։

«Բեռնափոխադրումների ծավալն ավելացել է. Ընդհանուր առմամբ, մենք շատ հաջող համագործակցում ենք բոլոր հարցերում՝ լինի դա էներգետիկ, տրանսպորտ, լոգիստիկա, թե այլ բնագավառ։ Մեր երկաթուղիները նույնպես շատ հաջող համագործակցություն ունեն։ Մենք նաև վերանայել ենք «Միջին միջանցքի» զարգացման հեռանկարները, մենք համագործակցում ենք Ադրբեջանի և Ղազախստանի հետ՝ արագորեն զարգացնելու այս միջանցքը, որը ներառում է երկաթուղիների արդիականացում, նավահանգիստների ընդլայնում և կառուցում, ինչպես նաև ճանապարհների արդիականացում։ Այս առումով Ադրբեջանը լայնածավալ աշխատանքներ է սկսել, Վրաստանում սկսել ենք նաև երկաթուղիների արդիականացման հետ կապված աշխատանքները, որոնք կավարտվեն մինչև 2024 թվականի վերջ և երկաթուղու թողունակությունը կավելանա, այն կկրկնապատկվի»։ Ղարիբաշվիլին ասել է.

Բացի այդ, Իլհամ Ալիեւի հետ համատեղ ճեպազրույցում Իրակլի Ղարիբաշվիլին խոսել է Ադրբեջանի հետ համատեղ նախագծերի մասին։

«Մենք սկսում ենք նաեւ նոր նավահանգստի՝ Անակլիա նավահանգստի շինարարությունը։ Վերջին փուլի ավարտից հետո նավահանգստի հզորությունը կկազմի 100 մլն տոննա։ Նաև շատ շուտով կավարտվի Արևելք-Արևմուտք արագընթաց մայրուղու շինարարությունը։ Այս բոլոր նախագծերում մենք համագործակցում ենք Ադրբեջանի հետ։ Բացի այդ, մի քանի ամսից կավարտվի պատմական, ռազմավարական նշանակության նախագիծը՝ Բաքու-Թբիլիսի-Կարս նախագիծը, որը հաջողությամբ իրականացվում է։ Մենք ունենք շատ հստակ հեռանկար, ունենք հեռատես տեսլական։ Մենք ցանկանում ենք շատ երկարաժամկետ ռազմավարական գործընկերություն և բարեկամություն ունենալ Ադրբեջանի հետ։ Ես հավատում եմ մեր համատեղ տեսլականին»,- ասել է Ղարիբաշվիլին։