Իրակլի Ղարիբաշվիլի. Իննը ամիսների ընթացքում Վրաստանում գրանցվել է 10,2 տոկոս տնտեսական աճ, որն աննախադեպ է Եվրոպայում
9 ամսվա ընթացքում Վրաստանի տնտեսական աճը կազմել է 10,2 տոկոս, ինչն աննախադեպ է Եվրոպայում,- այս մասին կառավարության նիստում հայտարարել է Վրաստանի վարչապետ Իրակլի Ղարիբաշվիլին։
Կառավարության ղեկավարի խոսքով, ակնկալվում է, որ տարեվերջին երկիրը կունենա երկնիշ տնտեսական աճ։
«Ես ուզում եմ անդրադառնալ տնտեսական աճին։ Ինչպես գիտեք, ներկայիս աշխարհաքաղաքական մարտահրավերների և լարվածության ֆոնին մենք երկրում պահպանում ենք բարձր տնտեսական աճ։ Իննը ամիսների ընթացքում Վրաստանում գրանցվել է 10,2 տոկոս տնտեսական աճ։ Սա աննախադեպ է ողջ Եվրոպայում։ Նաև ասեմ, որ արտահանումն աճել է 40 տոկոսով, իսկ իննը ամսում աճը կազմել է 37,4 տոկոս։ Արտահանումից ստացված եկամուտները կազմել են չորս միլիարդ ԱՄՆ դոլար։
Զբոսաշրջությունը վերականգնվում է արագ տեմպերով: Եթե համեմատենք 2019 թվականի հետ, ապա այս տարի զբոսաշրջությունն արդեն վերականգնվել է 97,5 տոկոսով։ Դրանից ստացված եկամուտները կազմել են 2,5 մլրդ ԱՄՆ դոլար։
Չեմ ուզում նախապես կանխատեսումներ անել, բայց մինչև տարեվերջ մեր ակնկալիքն այն է, որ մենք կպահպանենք նման բարձր տնտեսական աճը և տարեվերջին ակնկալում ենք երկնիշ տնտեսական աճ»,- ասել է վարչապետը: