Խոսքը հանրությանը մոլորեցնելու մասին է, որ Աբխազիայի երկաթուղու վերականգնման վերաբերյալ գաղտնի բանակցություններ են ընթանում, ես ամենայն պատասխանատվությամբ հայտարարում եմ, այս հարցի շուրջ բանակցություններ չկան,- հայտարարել է Վրաստանի վարչապետ Իրակլի Ղարիբաշվիլին՝ խորհրդարանին տարեկան զեկույցը ներկայացնելիս։

Կառավարության ղեկավարի խոսքով՝ հարցին, թե ինչ դեպքում է հնարավոր Աբխազիայի երկաթուղու վերականգնումը, պատասխանը մեկն է՝ միայն մեր երկրի միավորման դեպքում հնարավոր կլինի վերականգնել:

«Ոչ մի թաքնված օրակարգ չունենք, եթե ինչ-որ հարցի մասին խոսենք, բոլորն ամեն ինչ գիտեն՝ թե՛ երկրի ներսում, թե՛ դրսում։ Այսպիսով, այստեղ հարցեր չկան: Ինձ հարց տվեցին, թե ո՞ր դեպքում հնարավոր կլինի վերականգնել աբխազական երկաթուղին։ Սրա պատասխանը մեկն է՝ միայն մեր երկրի միավորման դեպքում: Հարց է տրվել՝ ինչպիսի՞ն է մեր երկրի տեսլականը Աբխազիայի հետ կապված։ Ամեն օր, մեր յուրաքանչյուր նպատակ, յուրաքանչյուր մտածված քայլ մեզ ավելի է մոտեցնում ազգային ընդհանուր այս մեծ նպատակին։ Սա պետք է լինի մեր ընդհանուր ազգային նպատակը, ոչ թե հանրությանը չհետաքրքրող ինչ-որ անհասկանալի թեմաներ, նրանց հորինած հարցեր։ Սա պետք է լինի հիմնական թեման, ես կարծում եմ, որ սա հնարավորություն է և՛ մեր աբխազների, և՛ օսերի համար, և՛ ամբողջ երկրի համար, որ ընդհանրապես ունենանք այլ երկիր, մեր երկիրն ամբողջությամբ փոխվի։ Ամբողջացման դեպքում այս վայրը կարող է դրախտ դառնալ։ Այստեղ միլիարդավոր դոլարներ են ներդրվելու, հենց որ երկիրը կարգավորվի, օկուպացիան ավարտվի, մեր բոլոր ուժերը պետք է սրա վրա լինեն, բոլորս պետք է քնենք ու արթնանանք դրա մասին մտածելով, այդ թվում՝ ընդդիմությունը, իրենք էլ քաղաքացիներ»,- ասել է վարչապետը։