Հավատում եմ, որ այս օրը խաղաղ կավարտվի, մենք մեկ անգամ ևս ճիշտ ընտրություն կանենք, և վաղը կլինի ավելի լավը, քան այսօր,- ասել է Վրաստանի վարչապետ Իրակլի Ղարիբաշվիլին Վակեի ընտրատարածքի 11-րդ ընտրատեղամասում, որտեղ իր ընտրությունն է կատարել կնոջ և երեխաների հետ։

Կառավարության ղեկավարը դիմել է «Վրացական երազանքի» ընտրողներին խնդրանքով, որ բոլորը գնան քվեարկության և գրանցեն իրենց ընտրությունը։

«Ես, իհարկե, քվեարկել եմ հանուն մեր երկրի խաղաղ զարգացման, մեր երկրին ու մեր ժողովրդին առաջին հերթին պետք է խաղաղություն, հանգստություն, կայունություն, զարգացում և բարգավաճում, ինչը մեր հիմնական և ընդհանուր ազգային գաղափարն ու նպատակն է։ Հավատում եմ, որ այսօր մեր ժողովուրդը կկայացնի ևս մեկ խելամիտ որոշում և կքվեարկի հանուն երկրի կայունության, այլ ոչ թե ապակառուցողական ընդդիմությունից բխող քաոսի, անհանգստության, անկարգությունների, հակասությունների ու բևեռացման։ Սա իմ ընդհանուր ցանկությունն է, և ես հավատում եմ, որ այսօր բոլորս նորից ճիշտ ընտրություն կանենք։ Ես հավատում եմ, որ վաղը ավելի լավն է լինելու, քան այսօր, և ես հավատում եմ, որ այս ընտրություններով մենք, անշուշտ, հավատարիմ ենք ազատ, թափանցիկ ընտրությունների անցկացմանը: Ես հավատում եմ, որ այս օրը խաղաղ կավարտվի։ Ես ուզում եմ բոլորին կոչ անել ակտիվության, մեր ընտրողներին, բոլորին դիմում եմ խնդրանքով, որ բոլորս գնանք քվեարկության և ֆիքսենք մեր ընտրությունը։ Սա շատ կարևոր է մեր ապագայի, մեր երեխաների, մեր ընտանիքների և մեր երկրի համար»,- ասել է Իրակլի Ղարիբաշվիլին։