Բանկերը և ֆինանսական հատվածը շահութահարկի այսպես կոչված էստոնական մոդելին չեն անցնի և նրանց համար կպահպանվի գործող համակարգը։

Այս մասին կառավարության այսօրվա նիստում հայտարարել է Վրաստանի վարչապետ Իրակլի Ղարիբաշվիլին։ Վարչապետի խոսքով՝ իրենք դիմելու են խորհրդարան՝ էստոնական մոդելի գրանցումը չեղարկելու նախաձեռնությամբ։

Միաժամանակ Իրակլի Ղարիբաշվիլին նշել է, որ 15 տոկոսի փոխարեն բանկերի համար շահութահարկը կկազմի 20 տոկոս։

«Մենք Տնտեսական խորհրդի ձևաչափով քննարկումներ ենք ունեցել, և ես ուզում եմ հանրությանը տեղեկացնել որոշ կարևոր որոշումների մասին, այդ թվում՝ բիզնես հատվածի և բանկային հատվածի մասին։ Նախ ֆինանսական հատվածի համար մենք կայացրել ենք հետեւյալ որոշումը՝ բանկերն ու ֆինանսական հատվածն այլեւս չեն անցնի, շահութահարկ այսպես կոչված էստոնական մոդելի վրա։ Մենք նրանց համար կպահպանենք գործող շահութահարկի համակարգը։ Էստոնական մոդելի մուտքը կչեղարկվի։ Այս նախաձեռնությամբ ենք մտնում խորհրդարան, քանի որ չարդարացված է, որ բանկերը այդքան մեծ շահույթ ունեն, երկու միլիարդ լարի կլինի բանկերի զուտ շահույթն այս տարի՝ տարեվերջին։ Բացի այդ, մեր նախաձեռնությամբ, և մենք դա կուղղենք խորհրդարանին, բանկերի համար շահութահարկը 15 տոկոսի փոխարեն կկազմի 20 տոկոս, և սրանով մենք ակնկալում ենք լրացուցիչ եկամուտներ ստանալ 2024 թվականից։ Նաև բանկերը շահութահարկ են վճարելու ֆինանսական հաշվառման հաշվետվության միջազգային ստանդարտներով, ինչը նախկինում չի եղել։ Իհարկե, մենք բարձր ենք գնահատում բանկերի դերը տնտեսության աճի գործում, չափազանց կարևոր է, որ մենք ունենք շատ զարգացած բանկային համակարգ, երկու խոշոր բանկեր գտնվում են Լոնդոնի ֆոնդային բորսայում, և մենք հետագայում էլ կշարունակենք խթանել դրանք։ Սրանք փոքր ուղղումներ են, որոնք մենք կատարել ենք օրենսդրության մեջ»,- ասել է Իրակլի Ղարիբաշվիլին։

Վարչապետը նաև նշել է, որ գյուղատնտեսության և գյուղատնտեսական կոոպերատիվներում զբաղված անձանց հարկային արտոնությունները կերկարացվեն ևս երեք տարով՝ մինչև 2026 թվականը: