Վրաստանը կարևոր դեր է խաղում Արևելք-Արևմուտք կապի մեջ,- ասել է Վրաստանի վարչապետ Իրակլի Ղարիբաշվիլին Բաքվում SPECA տնտեսական ֆորումի ժամանակ։

Իրակլի Ղարիբաշվիլիի խոսքով, Վրաստանի կառավարությունը զգալի ներդրումներ է կատարում լայնածավալ նախագծերում։

«Կապի խթանումը մեզ համար ռազմավարական նշանակություն ունի։ Մեր երկիրն ունի շատ հետաքրքիր ռազմավարական աշխարհագրական դիրք և նաև գրավիչ բիզնես միջավայր։ Վրաստանն արդեն իսկ կարևոր դեր է խաղում Արևելք-Արևմուտք կապի մեջ, և նրա ընդհանուր դրական տնտեսական, բիզնես և ինստիտուցիոնալ հեռանկարները համահունչ են մեր նպատակին՝ ապահովելու կայունություն և բարգավաճում ողջ տարածաշրջանում: Տարածաշրջանային առևտուրը խթանելու նպատակով իմ կառավարությունը զգալի ներդրումներ է կատարում լայնածավալ նախագծերում։ Վերջին տարիներին ներդրումներ են կատարվել երկրի մայրուղիների, երկաթուղիների և օդանավակայանների արդիականացման, ինչպես նաև նոր տրանսպորտային ենթակառուցվածքների նախագծերի մշակման ուղղությամբ։ Այժմ մենք աշխատում ենք նոր նախագծի վրա, որը Անակլիայում նոր նավահանգստի կառուցումն է, և այն գտնվում է վերջնական փուլում։ Անակլիա խորջրյա նավահանգստի հզորությունը կկազմի տարեկան 100 մլն տոննա։ Նաև մենք միասին աշխատում ենք սևծովյան ստորջրյա էլեկտրահաղորդման մալուխի նախագծի վրա, որը մենք նախաձեռնել ենք և որը ստորագրվել է Վրաստանի, Ադրբեջանի, Հունգարիայի և Ռումինիայի ղեկավարների կողմից անցյալ տարի դեկտեմբերին Բուխարեստում։ Կարծում ենք՝ այս նախագիծը շատ հետաքրքիր կլինի ոչ միայն մեր տարածաշրջանի, այլև Եվրոպայի համար»,- ասել է Իրակլի Ղարիբաշվիլին։

Նրա խոսքով, վերջին հինգ տարիների ընթացքում Վրաստանի երկաթուղիների բեռնաշրջանառությունն աճել է 48 տոկոսով։

«Մինչև 2024 թվականի վերջը՝ երկաթուղու արդիականացման ծրագրի ավարտից հետո, մեր երկաթուղիների թողունակությունը կկրկնապատկվի՝ հասնելով տարեկան 48 միլիոն տոննայի։ Մենք նաև ակտիվորեն աշխատում ենք Ադրբեջանի հետ Բաքու-Թբիլիսի-Կարս երկաթուղային գծի կառուցման ուղղությամբ, որը կավարտվի 2024 թվականին։ Կառավարությունը նաև լուրջ, զգալի կապիտալ ներդրումներ է կատարում Արևելք-Արևմուտք ավտոմայրուղու նախագծում: Աշխատում ենք նաև նոր օդանավակայանի զարգացման վրա, որը տարածաշրջանային ավիացիոն տարանցիկ կենտրոն դառնալու ներուժ կունենա»,- նշել է վարչապետը։