Վրաստանի քաղաքացի Իրակլի Բեբուան, ով ձերբակալվել է օկուպացված Աբխազիայի այսպես կոչված իշխանությունների կողմից 2020 թվականի սեպտեմբերի 30-ին, կազատվի կալանքից 2025 թվականի մարտի 30-ին։

Այս մասին հաղորդում է «Էխո Կավկազա»-ն՝ հղում անելով այսպես կոչված ՆԳՆ-ին։

Իրակլի Բեբուան ձերբակալվել է 2020 թվականի սեպտեմբերի 30-ին։ Նրան մեղադրանք էր առաջադրվել երեք հոդվածով՝ «պետական խորհրդանիշների անարգում, ուրիշի գույքի դիտավորյալ վնասում կամ ոչնչացում, ինչը անզգուշությամբ կարող էր առաջացնել մարդու մահ կամ ծանր հետևանքներ, և ռազմական ռազմամթերքի անօրինական պահում»։

Գալիի այսպես կոչված քաղաքային դատարանը նրան դատապարտել էր 9 տարվա ազատազրկման և նշանակել դրամական տուգանք։

Աբխազական տելեգրամ ալիքին տված հարցազրույցում այսպես կոչված ՆԳՆ նախարար Ռոբերտ Կյութը հայտարարել է, որ Իրակլի Բեբուան «կալանքից կազատվի օրենքով սահմանված ժամկետին»։

«Նրան ձերբակալել են 2020 թվականի սեպտեմբերի 30-ին, բոլորը գիտեն դա։ Նա այրել է պետական դրոշը, որի համար նրան դատապարտել են 9 տարվա ազատազրկման։ Ընդհանուր առմամբ նա պետք է պատիժը կրի բանտում 4 տարի և 6 ամիս։ Մարտի 30-ին լրանում է նրա կալանքի ժամկետը։ Հետևաբար, մենք պարտավոր ենք նրան ազատ արձակել։ Ոչ ոք չի նախատեսում այս մարդուն ժամկետից շուտ ազատել։ Ամեն ինչ տեղի է ունենում դատավորի կողմից նշանակված հոդվածների և պայմանների համաձայն», – ասել է Ռոբերտ Կյութը։