Վրաստանի արտաքին գործերի նախարար Իլիա Դարչիաշվիլին հանդիպել է Վրաստանում գտնվող Հնդկաստանի արտաքին գործերի պետնախարար Մենակշի Լեխիի հետ։

Արտաքին գործերի նախարարության տեղեկատվության համաձայն՝ հանդիպմանը կողմերը քննարկել են Վրաստանի և Հնդկաստանի միջև հարաբերությունների ընթացիկ հարցեր։ Գերատեսչության տվյալներով՝ հատուկ ուշադրություն է դարձվել տնտեսական, մշակութային, կրթական և մարդասիրական ոլորտներում երկկողմ համագործակցության զարգացման կարևորությանը։

«Խոսելով մշակութային-կրթական ոլորտում երկու երկրների միջև առկա համագործակցության մասին՝ գոհունակությամբ նշվեց, որ Վրաստանը ստեղծել է բոլոր պայմանները հնդիկ ուսանողների համար բարձրագույն կրթություն ստանալու համար։ Հանդիպման ընթացքում անդրադարձ է եղել նաև Վրաստանում հնդիկ գործարարների գործունեությանը և դրա հետագա զարգացման հեռանկարներին։

Բացի այդ, հանդիպման ընթացքում քննարկվել են միջազգային կազմակերպությունների շրջանակներում համագործակցության հարցեր։ Վրաստանի արտաքին գործերի նախարարը շնորհակալություն է հայտնել հնդկական կողմին՝ Վրաստանի ինքնիշխանությանն ու տարածքային ամբողջականությանը աջակցելու համար։ Հանդիպման ավարտին կողմերը ևս մեկ անգամ հաստատել են երկու երկրների միջև արդյունավետ համագործակցությունը շարունակելու պատրաստակամությունը»,- ասված է Վրաստանի արտաքին գործերի նախարարության հաղորդագրության մեջ։