Վրաստանի արտաքին գործերի նախարար Իլիա Դարչիաշվիլիի խոսքով, խորհրդանշական է, որ Վրաստանի ներկայացուցիչները Բուխարեստում են՝ ՆԱՏՕ-ի նախարարների հանդիպմանը։ Նրա խոսքով, իրենք եւս մեկ անգամ հնարավորություն են ունեցել խոսելու Վրաստանի արտաքին քաղաքական առաջնահերթությունների կարեւորության մասին։

Բացի այդ, ինչպես ասում է Իլիա Դարչիաշվիլին, իրենք շատ ուժեղ, աջակցող ուղերձներ են լսել իրենց գործընկերներից։

«Իսկապես խորհրդանշական է, որ Վրաստանն այսօր այստեղ է՝ ՆԱՏՕ-ի նախարարների հանդիպմանը, որտեղ մենք ևս մեկ անգամ հնարավորություն ունեցանք խոսելու արտաքին քաղաքականության առաջնահերթությունների կարևորության, մեր անսասան ջանքերի մասին՝ ուժեղ քայլ կատարել դեպի շատ կարևոր արտաքին քաղաքական առաջնահերթությունները, որ մենք վերցրել ենք այն ժամանակ:

Նաև խորհրդանշական է, որ մենք Բուխարեստում ենք։ Մենք շատ ուժեղ, աջակցող ուղերձներ լսեցինք մեր գործընկերներից: Խոսքը, մի կողմից, մեր երկրի տարածքային ամբողջականության և ինքնիշխանության մասին էր, որտեղ ևս մեկ անգամ մեր գործընկերները միաձայն և միանշանակ ընդգծեցին, որ Վրաստանն ունի գործընկերներ, որոնք հաստատապես պաշտպանում են մեր երկրի տարածքային ամբողջականությունը։ Մյուս կողմից, ընդգծվել են այն որոշումները, որոնք ընդունվել են Մադրիդում ՆԱՏՕ-ի վերջին գագաթնաժողովում, որտեղ ստեղծվել է Վրաստանի կարիքներին հարմարեցված օգնության փաստաթուղթ, որի իրականացումը մեզ համար առանձնահատուկ նշանակություն ունի։ Այս ուղղությամբ մեր գործընկերները շատ հստակ հայտարարել են, որ աջակցում են Վրաստանի ինտեգրմանը ՆԱՏՕ-ին, և այդ գործընթացը միանշանակ շարունակվելու է։ Ընդգծվել է, որ Վրաստանը ՆԱՏՕ-ի հավատարիմ գործընկերն է տարածաշրջանում, և մենք վստահ ենք, որ նմանատիպ ձևաչափերում մեր ներկայացվածությունը կամրապնդի և նոր ազդակ կբերի ՆԱՏՕ-ին ինտեգրվելու ուղղությամբ»,- ասել է Իլիա Դարչիաշվիլին։