Շատ կարևոր հանդիպում էր, մենք քննարկեցինք, որ Վրաստանը լինելու է Գերմանիայի միջազգային օրակարգում, ինչը, կարծում եմ, կօգնի մեզ շարունակել շատ ակտիվ աշխատել մեր գործընկերների հետ՝ մեր եվրաինտեգրումն էլ ավելի ուժեղ դարձնելու, արդյունքին միտված լինելու համար, – ասաց ԱԳ նախարար Իլիա Դարչիաշվիլին, Բեռլինում այցի շրջանակներում՝ իր գերմանացի գործընկերոջ՝ Անալենա Բերբոկի հետ հանդիպումը գնահատելիս:

Նախարարի խոսքով, երկու երկրների արտգործնախարարությունների ղեկավարների հանդիպմանը հատուկ ուշադրություն է դարձվել Վրաստանի և Գերմանիայի միջև հարաբերությունների խորացման անհրաժեշտությանը, ինչպես նաև Գերմանիայի կարևոր դերին Վրաստանի եվրաինտեգրման գործընթացում։

Իլիա Դարչիաշվիլիի խոսքով, վրացական կողմը Գերմանիայի արտաքին գործերի նախարարին մանրամասն տեղեկատվություն է տրամադրել Եվրահանձնաժողովի հանձնարարականների կատարման ուղղությամբ:

Արտաքին գործերի նախարարն ընդգծել է նաև այցի շրջանակներում Վրաստանի և Գերմանիայի կառավարությունների միջև մշակույթի ոլորտում համագործակցության հուշագրի ստորագրման կարևորությունը։

«Ես պատիվ եմ ունեցել Վրաստանի կառավարության անունից ստորագրել հուշագիր, որը կամրապնդի Գերմանիայի և Վրաստանի միջև մշակութային համագործակցությունը։ Հանձնաժողովը, որի աշխատանքի արդյունքում ստացանք նշված հուշագիրը, ստեղծվել է վարչապետ Իրակլի Ղարիբաշվիլիի առաջին վարչապետության օրոք։ Այս հուշագիրը կլինի մեր համագործակցության նոր մեխանիզմը, որը կնպաստի մեր երկրներն էլ ավելի մերձեցնելուն»,- ասել է Դարչիաշվիլին։

Վրաստանի առաջին դիվանագետի խոսքով, գերմանացի գործընկերոջ հետ զրույցն անդրադարձել է նաև տարածաշրջանում առկա իրադարձություններին։

Նրա տեղեկություններով՝ վրացական կողմը խոսել է տարածաշրջանում խաղաղության ու անվտանգության ամրապնդման գործում Վրաստանի կարեւոր դերի եւ այդ ուղղությամբ Վրաստանի կառավարության ձեռնարկած քայլերի մասին։