Իլհամ Ալիև. Հուսանք, որ հաջորդ տարի մենք կավարտենք Բաքու-Թբիլիսի-Կարս երկաթուղու վրացական հատվածի ընդլայնումը
Հուսանք, որ հաջորդ տարի մենք կավարտենք Բաքու-Թբիլիսի-Կարս երկաթուղու վրացական հատվածի ընդլայնումը,- ասել է Ադրբեջանի նախագահ Իլհամ Ալիևը Բեռլինում գերմանական առաջատար ընկերությունների ղեկավարների հետ հանդիպմանը։
«Ադրբեջանը ներկայումս ներդրումներ է կատարում Բաքու-Թբիլիսի-Կարսի նեղ հատվածներից մեկի ընդլայնման համար՝ այս հատվածը գտնվում է Վրաստանում։ Արդյունքում բեռնափոխադրումների հզորությունը մեկ միլիոն տոննայից կհասցվի հինգ միլիոն տոննայի։ Ադրբեջանի կողմից լրացուցիչ ներդրումները կազմում են 120 մլն դոլար։ Հուսանք, որ հաջորդ տարի մենք կավարտենք այս աշխատանքը»,- ասել է Ադրբեջանի նախագահը։
Ալիեւի խոսքով, Ադրբեջանն աշխատում է նաեւ տրանսպորտային, ենթակառուցվածքների եւ մաքսային համակարգերի ինտեգրման ուղղությամբ։
«Մի քանի օրից Բաքու կժամանի Համաշխարհային մաքսային միության տնօրենը, և մեր քննարկվող հարցերից մեկն այն է, թե ինչպես կարող է Համաշխարհային մաքսային միությունը օգնել մեզ Կենտրոնական Ասիայի, Ադրբեջանի, Վրաստանի և Թուրքիայի միջև համակարգելու հարցում։ Ինտեգրված երթուղու հասնելու համար սակագների նկատմամբ միասնական մոտեցում է անհրաժեշտ։ Եթե մի երկիր, օրինակ՝ Ադրբեջանը, իջեցնի սակագինը, իսկ մյուսը չթանկացնի, կամ թանկացնի, ապա դա չի աշխատի»,- ասել է Ալիեւը։